Embaz Seyîd Evran her hela xo bi mana ciwîya. O raywanê rayîrêkê dergî bi. Ey sey felsefeya cuye tecrubeyê xo dayêne embazanê xo. Ey bi qelema xo vîrameyîşê embazanê xo nuştî û bi nê hawayî têkoşînê înan neslanê neweyan rê verda.

Embaz Seyîd Evranî tim embazanê neweyan rê qala ci kerde ke tradîsyonê çapemenîya azade binê şertanê zehmetan de resayo nê çaxî. Erkê pêro hemra û kurdîstanijan o ke vîrameyîşê Seyîd Evranî bipawê.

Şehîd Hozanî tim qala embaz Seyîdî kerdêne. Di lingê embaz Hozanî şer de qerifîyabî. Embaz Seyid bibi linganê ey. Seba embaz Seyîdî bi hezaran Hozanî est bîyê. 

Mi hêverî 2021 de o şinasna. Ey tim bi perwerîya têkoşînî zerrîya xo ra xizmet kerd. O şerê xo de isrardar bi. Ey her hele bi kameraya xo qeyd kerde. Yew pêkerdişê ma est bi, qaşo ma do pîya xebere viraştêne. La şertan rayîr nêda û ma nêeşkayî.

Ma do tim peyê roşnîya to de şorê. Qiseyê to ''Ge ge qelema ma herinda çeke bigêra, ge ge zî çeka ma herinda qelema ma bigêra'' tim do bibo kilawuzê ma.