Seyîd Evrano ke vîrê çapemenîya azade bibi, şehîd bi. O sey Apê Musa, Gurbetellîye Ersoz, Halîl Dag, Nûjîyane Erhan, Denîze Firat û Dilîşane Îbîş rayîrê raştîya û dewaya azadîye de bi meşaleyêk ke verê ma roşnî keno.
Yewîya Çapemenîya Azade (YRA) derheqê wefatê Seyîd Evranî de eşkerayîyêke daye ke Seyîd Evranî bi serran sey kedkarêkê ANFyî xebitîya.
Eşkerayîye wina ya:
''Embazê ma yo rojnameger, nuştox û şorişgêr Seyîd Evran 22yê êlula 2023yî de nêweşîya qelbî ra nêweşxane de şehîd bi.
Seyîd Evran vîrê çapemenîya azade yo 30 serre bi. O seba ke komelî roşnî bikerı bi qerardarî heqê pêro astengîyan û zehmetîyan ra ame. Ey bi tewir, çalakî û qelema xo rîpelanê çapemenîya azade de cayê xo yo bêhempa girewt.
Embazê ma Seyîdî cuya xo naye têkoşînî ser. O milîtanêkê têgêrayîşê azadîye û çapemenîya azade bi. Ey pê qelema xo têkoşînê Kurdîstanî resna pêro dinya.
Embazê ma Seyîd Evran bi nameyê xo yê nasnameyî Seyîd Mahmut Evran 1969 de qezaya Hêni ya Amedî de dadîya xo ra bîyo. Keyeyê ey mîyanê tradîsyonê serewedaritişê Şêx Seîdî de ciwîyayêne.
O ciwanîya xo de Têgêrayîşê Azadîye şinasneno û tewrê ci beno. O wextê Zanîngehê Çukurova de Gurbetellîye Ersoz şinasneno û beno wendekarê aye. Embaz Seyîd 1990 de Amed de tewrê refanê têkoşînê azadîye beno. O Tirkîya û Vakurê Kurdîstanî de xebatanê çapemenîye keno.
Wexto ke merkezê rojnameyê Ozgur Ulke yê Îstanbulî û ofîsê ci yê Anqara û Amedî 3yê kanûna 1994î de dîyayî bombayan ver embaz Seyîd Mudirê Karanê Nuşteyan b. Nê hêrişî de embaz Seyîd pa 23 embazan birîndar beno. La o rixmê pêro gefan zî xebatanê xo rê dewam keno.
O dima bi mesuldarî verê xo dan koyanê azadan. O bi serran rêçê Gurbetellîye de cuya gerîlayan û têkoşînê înan nuseno. O derheqê babetanê bînan de zî xeylêk nuşteyan nuseno û kitabê xo yê “Hayatın Kıyısına Yolculuk” vejeno.
O teyna Kurdîstan de ney her cayo ke kurdî tede bîyê de xebatanê xo keno. Şorişê Rojawanî ra dima 2012 de o derbazê Rojawanê Kurdîstanî beno. Embaz Seyîd Dêrikî ra heta Efrînî pêro cografyaya Kurdîstanî ra gêreno û embazanê ma zî perwerde keno.
Embaz Seyîdî serra 2020î ra nata nêweşîyanê xo ra antêne. O di reyî krîzê qelbî bi, çend reyî amelîyat bi. La tim pê coş û moralî ey xebatê xo kerdî. Dima reyna nêweş bi û 22yê êlule de şehîd bi.
Seyîd Evrano ke vîrê çapemenîya azade bibi, şehîd bi. O sey Apê Musa, Gurbetellîye Ersoz, Halîl Dag, Nûjîyane Erhan, Denîze Firat û Dilîşane Îbîş rayîrê raştîya û dewaya azadîye de bi meşaleyêk ke verê ma roşnî keno. Ey peyê xo de mîrasêko pîl verda. Ma soz danê ke do sey teqîbkerdoxanê ey têkoşîn û raştîya ey pîl bikerê.''
