Dimayê fermanê Wezaretê Karanê Zereyî yê Tirkî yê seba cigêrayîş, kontrolkerdiş û tebersînorkerdişê Sûrîyeyijan Stenbol ra nizdê 100 Sûrîyeyijî ameyî şirawitene bi Efrîn.

 Goreyê hayîdarîyan, Sûrîyeyijî Sêşeme resayî Efrîn. Yeno vatene mîyanê Sûrîyeyijanê ke bi çar wesayîtan ameyî berdene bi Efrînî Kurdî zî estê. Walîtîya Stenbolî wext dabi Sûrîyeyijan ke yê ke qeydê înan Stenbol de çino heta 20’ê Tebaxe bajar ra vejîyê. Qerar de ame îlankerdene ke Sûrîyeyijî do sewqê bajaranê ke qeydê înan ûca esto bêrê kerdene. Dewleta Tirkî ke destpêkê şerê Sûrîye ra nata koçberan hemverê Ewropa de sey enstrumanêkê ‘şantajî’ şuxulnena, bi qeraranê xo yê peyênan yê hemverê Sûrîyeyijan bale ancena.

Wezîrê Karanê Zereyî yê Tirkî Suleyman Soylûyî vatibi ke do serre de 80 hezar koçberî bêrê vetene teberê sînorî. Soylûyî verê çend rojan welatanê Ewropa rê gefî wendîbî ke eke ê beran akerê do hukmatê înan nêeşkê 6 mengan zî hemverê naye de vinderê. Wezîrê Karanê Teberî yê Tirkî Mevlut Çavûşoglûyî zî bi eşkerayîya Walîtîya Stenbolî pêhesna ke înan peymana agêrnayîşê koçberan a ke Yewîya Ewropa dir mor kerdebî vindarnaya.