Fermandaranê QSDyî yê herêma Firatî ra Cemîl Mazlûmî bi wesîleya serrgêra hêrişanê îşxalî yê vera Kobanê  ANFyî rê qisey kerd.

Qiseykerdişê Mazlûmî ra beşêk wina yo:

''Hêrişanê DAÎŞî ra verî şarê ma pê felsefeya Rayber Apoyî xo rêxistin kerdbi. Cerganê Sûrîye zî binê nameyê 'Artêşa Mîlî' de xo rêxistin kerdbi. Înan dormeyê Kantonanê Efrîn, Cizîre û Kobanê girewt û dest pê hêrişan kerd. Vera hêrişanê cergan 2011 ra heta 2014 bêmanê hêzanê ma xo ver da, şarê kurdî, YPG û YPJ xo pawit, sîstemê xo yê asayîşî awan kerd. DAÎŞ 2014 de vejîya werte. Şingalî ra dima cerganê DAÎŞî verê xo de Reqa, Dêra Zor, Ezaz, Heleb û Tutmurî, nê cayî vistî destî. Înan verî hêrişê Kantonê Cizîre kerd dima zî verê xo da Kobanê.

Wexto ke DAÎŞî hêriş kerd cebilxane û îmkanê Kobanê kêm bîyî. La hem şar hem zî şerwanê YPG-YPJyî qerardar bîyî. 7 serrî verî Kobanê de şer merg û cuye ame kerdene. Kobanê de di fikran şer kerd; felsefeya azadîye û hişmendîya kanwaze. Ya tarîtîye yan zî roşnîye do bin bikewtêne. Kobanê de roşnayîye ser kewte. Xoverdayîşê şerwanan bale dinya ante û hêzanê mîyanneteweyîyan bire daye ke vera DAÎŞ şer bikerê. Kobanê mojna pêro dinya ke DAÎŞ eşkîyeno bin bibo. Şaran zî paştî daye nê şerî. Kurdî sînoran ra derbaz bîyî û tewrê şerî bîyî. Pê paştdayîş û xoverdayîş şerwanî ser kewtî.

Xoverdayîşê Kobanê tesîrê pêro Sûrîye kerd. Şaranê Sûrîye mîyanê QSDyî de xo kerd rêxistin û tewrê şerî bîyî. YPG û YPJyî Baxoz de xoverdayîşî rê dewam kerd. Prosesê 6-7 serran de xoverdayîş û şer qewimîya.  Nê prosesî de DAÎŞî bi hezaran merdimî qetil kerdî û remnayî. Şerwanan Baxoz de DAÎŞ qedîna. DAÎŞ hetê fikrî ra hema zî esto.Heta ke projeyê neteweya demokratîke û fikrê azadîye nêrê caardene îxtîmal esto ke DAÎŞ newe ra gandar bibo.

Şarê ma nê 10 serran de bîyî wayîrê tecrube. Ê zanenê ke dost û dişmen kam ê. Ma pê şar û şerwananê xo bawer ê. Ma hêzê xo şehîdanê xo ra gênê. Sûrîye hema zî mîyanê krîzî de ya. Nika vera hêremanê ma hêrişê pîlî yenê kerdene. Ma pê tecrubeyê 2014î têgêrenê. Ma armanc kenê ke şorişî ser bivisnê. Ma pê xo bawer ê. Ma do ser bikewê.''