Xeylî kesî destê DAIŞ’î de, heta peynîye mendî. Tayê kesî zî hetê DAIŞ’î ra sey qalxanê ganî yî ameyî pêgirewtene. Heta ke dewa peyêne ya destê DAIŞ’î ameye girewtene, tayê kesê sivîlî hetê DAIŞ’î de ha bi waştene,ha bi zor, mendî. Nika ê bi xo zî matmendeyê û kesê ke înan vînenê zî matê ci mendê.

NÊ SIVÎLÎ KAM Ê?

Şerwanê QSD,YPG Û YPJ‘î înan sey sivîlan vînenê. Nê rojanê peyênan de zêderî cinî û doman, xeylî kesê sivîlî yenê. Nê kesan heta nika derheqê DAIŞ’î de yew çekuya xirabe nêvata. La hem ê, hem zî domanê înan vêşanîye ver bêqudim kewtê.

Yew cinîya şerwane, yew lajekê qilêrinî gêna virana xo û ci rê huyena.Lajekî ci rê ziwan veto û rîyê aye de ewnîyeno. Yew şerwano camêrd, mabênê cinîyanê kincsîyayan de, bi koçike keno ke werd bido yew domanî. Mabênê nê sivîlan de tena rîyê domanan akerde yo. Cinîyan serê ra heta binê lingan, heramîye sîyayî dayê xo ra.

Tenêna dot, yew şerwanê QSD virana xo de yew domanî ano. Yew cinîya ke kişta ey de ya, kifşo ke maya domanî ya û virana aye de zî yew derguş esto. Cinîye biqisawet derûdor de ewnîyena la rîyê ci girewte yo.“ Ma tivaje na cinîye zî hemcinsanê xo rê îşkence kerdo?“, “ Çi ra tîya de ya?“,“Çi ra remaya?“

Ma nêzdîyê dewa Baxozî de yîme. Tîya de erazî çol o. Sivîlê ke ameyê xelisnayene, hetê QSD’yî  û hêzanê koalîsyonî ra yenê kontrolkerdene. Senî ke wesayîtan ra bîyî peya, merdim kinc û kolanê înan ê cîyayan ferq keno. Kesê ke Surîyeyijî nîyê, înan ser o kinc-kol û solê bimarka estê. Qaso ke êno texmînkerdene nê cinîyî, cinîyê îdarekerdoxanê DAIŞ’î yê. Îdareyê DAIŞ’î de di konseptî yenê şuxulnayene. Yew Multecî, yew zî Şar o. Şar, şarê herême ra yeno vatene û wezîfeyê înan, kesanê multecîyan rê xizmete kerdene yo. 

Naye ra ver, wexto ke Reqa ameyebî xelisnayene cinîyan wina vatbî; “ Ma tersanê multecîyan ver nêeşkîyene ke sereyê xo bikinîme, bi desan cinîyê Êzîdîyî xizmeta înan de bî.“Sivîlanê Baxozî ra yewe zî ‘Om Sehîde‘ ya û no nameyê aye yo rastiken nîyo. Om Sehîde Fransa ra ya, nameyê xo yê rastikenî nêvana û wina qisey kena:“ Ez nameyê xo nêvana, xora bi texmînê mi ez yena şinasnayene.“ Nê qesayê Om Sehîde nîşan danê ke a Fransa de yena şinasnayene û sey sucdar yena dîyayene.

Yew cinîya Iraqije bi di kênayanê xo newe resta tîya. Çira heta nika hetê DAIŞ’î de menda ci ra ame perskerdene. Na perse ra dima va 3 lajê mi û merdeyê mi Baxoz de ameyî kiştene. La rîyê aye de janê vîndkerdişê 3 domanan û merdeyî nêno wendene. Yew kênaye zî bi gulaya DAIŞ’î ameya kştene û meyîtê aye ameyo wedardayene. Kesê ke teber ra ameyê wayîrê îstiranê xo nêvejîyêne û berbenê la keyeyê aye de ne berbîş ne zî refleksêko bîn êno wendene. No senî halo wina, merdiman hîssê xo yê merdimahî kerdê vîndî çi yo? Rastîya şerî sey şîrmaqê dayêne rîya merdimî ra.