Xeylêk şaristananê Rojawanê Kurdîstanî de  de şar vejîya meydanan û bi çalakîyan tecrîdê vera Rayberê Şarê Kurdî Abdullah Ocalanî û hêrişê dewleta tirke yê vera goran û herêma Zînî Wertê protesto kerdî.

Dêrik

Şaristanê Dêrikî yê Kantonê Qamişloyî de Têgêrayîşê Ciwanan ê Şorişgêran û Meclîsê Cinîyan ê Neweyî hêrişê dewleta tirke yê vera goranê şehîdan rayraşîyayîşêkê bi meşaleyan reyde protesto kerdî. Rayraşîyayîşî Merkezê Ciwanan ê Şehîd Bawerî de dest pêkerd û pê sloganan heta Meydanê Azadîye dewam kerd. Meydan de nameyê Têgêrayîşê Ciwanan ê Şorişgêran û Meclîsê Cinîyan ê Neweyî ser o Dilvîne Tolhildan eşkerayîya çapemenîye kerde. Dilvîne ard ziwan ke dewleta tirke pê hêrişanê vera goran nasnameyê kurdan hedef kena û alozîya Zînî Wertê zî parçeyêkê ney o. Dilvîne Tolhildan venga pêro ciwananê Kurdîstanî da ke pêro meydananê Kurdîstanî bikerê cayê xoverdayîşî û îşxalan vindarnê.

Girkê Legê

Bi seyan kesî Meydanê Şehîd Xebat Dêrikî de tewrê rayraşîyayîşê bi meşaleyan bîyî. Rayraşîyayîşî heta merkezê qeza dewam kerd û nameyê Têgêrayîşê Ciwanan ê Şorişgêran û Meclîsê Cinîyan ê Neweyî ser o eşkerayîya çapemenîye ameye wendene. Rayraşîyayîş pê sloganan qedîya.

Dirbêsîyê

Endamanê Têgêrayîşê Ciwanan ê Şorişgêran hêrişê dewleta tirke yê vera Zînî Wertê û tewirê Hukmatê Herêma Kurdîstanî pê rayraşîyayîşêk protesto kerd. Rayraşîyayîşî heta merkezê qeza dewam kerd. Rayraşîyayîş de pê sloganan tewirê Hukmatê Herêma Kurdîstanî û armancê dewleta tirke yê seba birakujî ameyî şermezarkerdene.

Şehba

Endamê Kongreya Starî û Yewîya Cinîyan a Newîye Meydanê Ehrasî de tecrîd û hêrişê dewleta tirke yê vera goranê gerîlayan şermezar kerdî. Cinîyan posterê Rayberê Şarê Kurdî Abdullah Ocalanî kiriştî û pê sloganê ''Sozê ma yo ke ma do dêsanê Îmraliyî birijnê û Rayber Apoyî reyde biciwîyê'' rayraşîyayîşêk kerd. Rayraşîyayîş de derheqê vera tecrîdî û perwerîya seba şehîdan de sloganî ameyî vatene. Rayraşîyayîş pê eşkerayîya çapemenîye qedîya.

Hesekê

Endamanê Têgêrayîşê Ciwanan ê Şorişgêran û Yewîya Cinîyan a Newîye pê eşkerayîyêka çapemenîye hêrişê dewleta tirke yê vera Zînî Wertê şermezar kerdî. Eşkerayîye de wina ame vatene: ''Ma do sey ciwananê şorişgêran heta ke hêrişê vera herême biqedê çalakîyanê xo dewam bikerê.''

Qamişlo

Endamanê Têgêrayîşê Ciwanan ê Şorişgêran û Yewîya Cinîyan a Newîye bi şîarê ''Ma îşxalkerîya tirkan û yê hemkaranê înan bin bikerê'' rayraşîyayîşê bi meşaleyan ame kerdene. Rayraşîyayîş de posterê Rayberê Şarê Kurdî Abdullah Ocalanî ameyî berzkerdene û sloganê ''Biciwîyo Serek Apo'', ''Xoverdayîş cu ya'', ''Kurdîstan do bibo gorê faşîzan'', ''Bimiro îxanet'' ameyî vatene. Rayraşîyayîşî ra idma eşkerayîya çapemenîye ameye wendene û rayraşîyayîş pê sloganan qedîya.