Hemserekê Meclîsê Îdareyî yê Herêma Cizîre Telat Yunusî derheqê hêrişanê dewleta tirke ya îşxalkere û rewşa Rojawanî de ANFyî rê qisey kerd.

Yunusî da zanayene ke dewleta tirke seba çinkerdişê Îdareyê Xoserî, şiknayîşê îradeyê şaranê Rojawanî û îşxalê Rojawanî tim hêriş kena. Yunusî vat: ''Dewleta tirke hêrişanê xo yê peyênan de qestî ra binawanîyê herême û dezgehê xizmetî hedef kerdî ke Îdareyê Xoserî bêçare bikera. Dewleta tirke bi nê hêrişan kena ke têkoşînê vera DAÎŞî zî asteng bikera. Îdareyo Xoser bi şorişê şaran awan bi. Ma sîstemê awankerdişî û pawitişî hertim pîya anê ca. Dezgehê Îdareyê Xoserî û şarê ma goreyê şerî, ambargo û hêrişan ameyê rêxistinkerdene.''

Telat Yunusî da zanayene ke hêrişanê peyênan de dewleta tirke herême de texrîbatêko pîl viraşto û vat: ''Îdareyo Xoser bi destekê şaranê xo payan ser de yo. Îdareyo Xoser bi pêro îmkananê xo keno ke nê texrîbatî raşt bikero.''

Telat Yunusî dîyar kerd ke rixmê pêro hêrişan zî şarî paştî danê dezgeh û hêzanê xo û vat: ''Şarê ma wareyanê xo ra fek vera nêdano. Tewir û qerardarîya şarê ma hêz û moralî dano ma zî. Îdareyo Xoser îdareyê şarî yo. Xora Îdareyo Xoser do tim cewabê hêrişan bido û asayîşê herême bîyaro ca. Şar bi serkewtişê Îdareyê Xoserî emîn o.''