PDKyo ke wextêkê dergî ra nara vera Şingal û êzidîyan propagandayêka reşkerdişî keno, Bexdadî reyde tay pêvînayîşî kerdî û 9ê teşrîna verêne de bi hukmatê merkezî yê Iraqî  Şingal û êzidîyan ser o peymanêka gemarine viraşte.

Hetê bînî ra Neteweyê Yewbîyayeyî (NY), DYA û Almanya zî seba peymane bîyî mabênçî. Dima ke peymane ameye îmzakerdene endamê Polîtburoyê PDKyî Felah Mustafayî NY, DYA, Almanya û Fransa rê sipas kerd.

Êzidîyan vera peymane nêrazîbîyayîşê xo mojna û pare kerd ke na peymane bêîradeyê înan ameye îmzakerdene û nêna qebulkerdene.

Hemserekê Meclîsê Îdareyê Xoserî yê Demokratîkî yê Şingalî, Hemserekê NAV-YÊKî Hecî Çelîk û Wekîla HDPyî Feleknase Uca peymane ANFyî rê ercnaye.

Hiçoyî vat: ''Peymane seke vera êzidîyan komployêk a û dewamê Fermanê 3ê Tebaxe ya.PDK û hukmatê Iraqî berpirsîyarê 3ê tebaxe yê. Heqê înan çin o ke Şingalî ser o qisey bikerê. Xora PDKyî 3ê tebaxe ra dima zî hêrişê Şingalî kerd. DYA û NY yê ke mîyanê komployî de cagirewtî, seba ma hemparê sûcî yê. Na peymane peymana tasfîyekerdişê êzidîyan a. Ma do aye qebul nêkerdê. Ma seba azadîya bedelê giranî dayî. Ma qet yew bira ke ma ra bêxebere ameya girewtene qebul nêkenê. Seke çîyêk nêqewimîyo ma nêeşkenê baigêrê wextê verê 3ê tebaxe. Êyê ke ganî bêrê hukmkerdene Hewlêr û Bexdad ê la ê ma ra hesab wazenê. Vanê şima çira çekî girewtî xo destî û xo pawit. Şingal do nêbo warê xayînan. Şingal warê êzidîyan o û do wina bimano.''

Hemserekê NAV-YEKî Hecî Çelîkî vat: ''Na peymane bê êzidîyan ameye kerdene coka nêna qebulkerdene. Hîşmendîya ke 3ê tebaxe de êzidîyî qir kerdî ewro reyna ha peyê têgêrayîşan de ya. Hêzê ke na peymane viraşte, 3ê tebaxe de remaybî. Êyê ke ganî êzidîyan ra efûya xo biwazê û hesab bidê, ewro seke çîyêk nêqewimîyo peymane kenê. Peymane serrgêra Komployê Mîyanneteweyî û îşxalê Serêkanîyê û Girê Sipî de ameye îmzakerdene. No tesadufî nîyo. Şexsê êzidîyan de wazenê ke komplo bidê dewamkerdene. Ganî her kes bizano ke netîceyê na peymane do giran bibê. Na peymana bitehluke nêna qebulkerdene. Ganî rayaumûmîya mîyanneteweyîye zî vera na peymane têbigêra. Ganî êzidîyî bi çalakîyan bîyarê ziwan ke ê na peymane qebul nêkenê.''

Wekîla HDPyî Feleknase Uca zî da zanayene ke peymane de îradeyê êzidîyan peygoş beno û vat: ''Na peymane Qirkerdişê 3ê Tebaxe yo ke nêmcet mend kena temam. Înanê ke na peymane îmza kerde, êzidîyî bêpawitiş verdayî û remayî. Armancanê DAÎŞî ra yew zî vengkerdişê Şingalî bi. DAÎŞ nêeşkîya naye bikera la ewro bi na peymane armancê DAÎŞî yeno caardene. Eke înan giringîye bidîyêne şarê Şingalî ganî fikrê înan bipersayêne. Çunke şarê Şingalî zaf bedelî dayî. YNK, Goran, partîyê îslamî û partîyê dînî yê Başûrî çira vera peymane hende bêveng ê? PDK senî eşkeno xo bi xo birêka winasêne bido?Eke wina dewam bikero PDK siba nê bîr seba herêmanê bînan zî peymananê winasênan amade bikero.''