Dewleta tirkî roja yewşemeyî hêrişê dewanê Kobanê kerd. Merkezê Têkilîyanê Dîplomatîkan ê TEV-DEMî ard ziwan ke dewleta tirkî nêwazena aşitî virazîyo.

TEV-DEMî vat: “No wexto ke DAÎŞ hêdî hêdî qedêno, Sûrîyeyêka newî yena awankerdene û seva çareserîyêka sîyasîye şertî bîyê rind dewleta tirkî bi polîtîkayanê xo şerrî kena vêşî.”

TEV-DEMî bale ante wextê hêrişî û vat: “Dewleta tirkî dewanê Kobanê ser o wina wextêk de hêriş viraşt ke ê wextî de Tirkîye, Almanya, Fransa û Rûsya ameyî têhet, serragêrayîşê xelesnayîşê Reqa bi. No ramojneno ke Tirkîye wazena şerr Sûrîye de dewam bikero.”   

TEV-DEMî ard ziwan ke “Tu sebebo heqdar ê nê hêrişanê dewleta tirkî yê nêmeşruyan çinêyo” û nê vatî:

“Îdarekarîya Vakur û Rojhelatê Sûrîye, wayîrê heqî ya ke projeyanê demokratîkan ê herême û Sûrîye bipawo û heqê xo yê xopawitişî zî bica biyaro. Şarê  kurd, ereb, suryanî, asurî û heme netewe û bawerîyan ra şarî wayîrê heqî yê ke xo hemverê her tewir hêrişî de bipawê.”

TEV-DEMî dewamê vengdayîşê xo de bişidet hêrişanê dewleta tirkî şermezar kerd û wina vat: “Sere de Konseya Asayîşî ya Yewîya Neteweyan, Yewîya Ewropa û Koalîsyonê Mîyan-neteweyî ma veng danê heme hêzanê ke tewrê meseleyê  Sûrîye bîyê wa şerrê ma yê hemverê DAÎŞî bivînê û hemverê hêrişanê ke wazenê vernîya çareserîya demokratîke bigîrê tedbîran bigîrê. Gureyê nê hêzan ra yew zî viraştişê Sûrîyeyêka demokratîke ya û gureyêkê înan o bîn zî girewtişê vernîya îşxalkarî û hêrişanê dewleta Tirkîye yo.”

Eşkerayî wina qedîyaye: “Ma zere û teberê welatî de heme yewîyan, şarê xo, partîyanê sîyasîyan û têgêrayîşanê cimatkî û sivîlan ra wazenê ke reaksîyonêkê xurtî hemverê hêrişanê dewleta tirkî de ramojnê.”