Têgêrayîşê Komelê Demokratîkî (TEV-DEM) serrgêra 5ine ya destpêkerdişê hêrîşê îşxalî yê artêşa tirke yê vera herêma Efrînî de, eşkerayîye daye.

Eşkerayîye wina ya:

''5 serran ra ver artêşa tirk a îşxalkerdoxe û çeteyê aye bi heme hêzê xo hewl da ke şaranê herême yê eslîyan qir bikerê. Bêvengîya komelanê mîyanneteweyî goreyê xo xebitneye, ke ê zî seba menfeetanê xo yê sîyasî û ekonomîkan ê qilerinan, hemverê nê sucî de ke şarê Efrînî rê yeno kerdene, çimanê xo girewtê. Peynîye de Efrîn bi qurbanê sîyasetanê sîstemê faşîst û dîktatorî.

Dima, înan Efrîn kerd merkezê teror û grûbanê çeteyan, sere de grûbê ke lîsteya mîyannetewî ya terorî de ca gênê.

20ê çeleyê 2018î de artêşa tirk a îşxalkerdoxe bi heme hêzê xo herêma Efrînî de hêrîşêk da destpêkerdene. Û tede heme tewiranê çekê hewa û erdî xebitnayî û xeylê grûbê çeteyî zî beşdar bîyî. Armancê înan o bî ke, heme binawanîya herême û ewlehî, îrade û xoverdayîşê şarê aye bixeripnê, û sewbîna seba hewn û armancê xo yê herême, demografîya herême bedilnaye, kolonîyî awan kerdî, darî birnayî, mal û mulkê welatîyan, mesken û tarîxê Efrînî talan û wêran kerdî. Şarê ci dayê remnayene, kiştî û dayê koç kerdene. Efrîn, bi şarê xo û bi heme sazgehanê xo do bibo wayîrê xoverdayîşê serdemî yê tewr girdî. Xoverdayîşo ke heme şarê dinya heşar kerdî. No xoverdayîş  zî heta nika dewam keno û do heta teqezkerdişê agêrayîşê ewleyî yê Efrînî dewam bikero.

Hemverê koçberanê Efrînî yê ke Şehba de yê, ablûqaya ke hukumetê Şamî, topvarnayîşê rojane yê artêşa tirk a îşxalkerdoxe û îsrarê her di rejîman ke pêameyîşêko newe virazê, nîşan dano ke sîyasetê înan ê şofanîst, hemverê îrade û xoverdayîşê şarê Efrînî de vindî kerdo. Ma venga heme sazgeh û rêxistinanê sîvîl û mîyannetewîyan danê ke heqê merdimîye rê têkildar ê. Û ma venga rayapêroyî, sere de Neteweyê Yewbîyayeyî (NY) danê ke hemverê ablûqaya hukumetê Şamî ya domanan û koçberanê Efrînî yê ke Şehba de, wa vengêko cîdî û bihêz bivejê.

Û sewbîna ma venga heme hêzanê sîyasî û nîştîmanî yê herême danê ke bi raya vengêkê sîyasî yê exlaqî wa destek bidê şarê ma û zor bidê hukumetî ke ablûqayî hewano û peynîya îşxalkerdişê tirkî yê vera Efrînî û yê pêroyê cayan bîyarê.''