Têgêrayîşê Komelê Demokratîkî (TEV-DEM) eşkera kerd ke Tekîn Goyî (İsmet Unver) o ke 32 serrî xeylêk waranê Kurdîstanî de têkoşîn kerd û tewr peynî de xebatê weşîye yê Rojawanî rayra berdêne, hêrişê dewleta tirke de şehîd bi.

Eşkerayîya TEV-DEMî wina ya:

''Dostê ma İsmet Unver (Tekîn Goyî) yo ke şorişgêranê serkêşan ê Kurdîstanî ra yo 19ê tebaxe ya 2024î de gama ke Qamişlo de xebata weşîye rayra berdêne hêrişê dewleta tirke yê bi teyaran de şehîd bi.

Embazê ma Tekin Goyî yo ke bajarê Şirnexî yê Botanî de ame dinya domanîye û ciwanîya xo cografaya zore ya Kurdîstanî de ravîyarna. Embazê ma Tekin vera zulmî bi hîsê qesasî 1992 de bi paştayîşê keyeyê xo tewrê refanê gerîlayan bi û 1996 de şi warê Rayber Apoyî. Badê perwerdeyanê Rayber Apoyî xeylêk waranê Kurdîstanî de têkoşîn kerd. Waranê xoverdayîşî yê sey Behdînan, Botan, Mêrdîn, Qendîl, Rojawan û Şingal de aktîf wezîfe girewt û nê waran de zerrîya şarî cayê xo de ca girewt  û bi sîmgeyê têkoşînê azadîye.

Hemra Tekin emrê xo da têkoşînê azadîye. 32 serrî her cayê Kurdîstanî de xover da û kede daye. Hemra Tekin nê şerê giranî de birîndar bi û linga xo ya çepe vînî kerd la têkoşînî ra dûrî nêkewt. Fermandaro pîl, hemra Tekinî xo şarê xo rê feda kerd. Gama ke çeteyanê DAÎŞî 2014 de hêrişê Rojawanî kerd, ey cade verê xo da Kobanê û tîya sey fermandarê serkewteyî refanê verênan ê şerê têkoşînî de ca girewt. Badê binkewtişê DAÎŞî xeylêk xebatanê xizmetê komelkî de xebitya. Tewr peynî de xebatê weşîye rayra berdêne.

19ê tebaxe de Qamişlo de hêrişê hewayî yê dewleta tirke de şehîd bi. Hemra Tekin şorişgêrêko bêhempa bi, o do tim mîyanê têkoşînê şarî de biciwîyo. Ma şexsê hemra Tekinî de heme şehîdanê xo yad kenê û soz danê ke ma do qesasê şehîdan bîgêro û waştişê înan bîyarê ca. Na çarçewa de ma keyeyê erjîyayeyî yê hemra Tekinî rê, şarê welatperwerî yê Botanî û heme şarê herême rê serweşî wazenê.''