Til Temirî hedefê îşxalê dewleta tirke de yo. Ciwanê kurdî, erebî, asûrî û sûryanî şaristanê Til Temirî de kom bîyî û înan Meclîsê Leşkerî yê Til Temirî awan kerd. Serekê Meclîsî Brûskî vat: ''Ciwanê şarê herême seba ke vera îşxalkeran têkoşîn bikerê ameyî pêser.''

Serekê Meclîsê Leşkerî yê Til Temirî Demhat Brûskî ronayîş û armancê meclîsî ser o ANF reyde qisey kerd. Brûskî vist vîrî ke dewleta tirke vera hêriş û bawerîyanê herême xîret kena ke dest naya erdê înan ser û vat: ''Vera naye ma sey ciwananê herême kom bîyî. Ma vera îşxalkeran mil bi mil do têkoşîn bikerê. Dewleta tirke Til Temîr rê gef werdêne. Ma zî waşt ke pawitişê erdê xo bikerê û ma bi nê hawayî Meclîsê Leşkerî yê Til Temirî awan kerd.''

Brûskî pare kerd ke zaf ciwanê kurdî û erebî yê Serêkanîyê cayê xo meclîs de gênê û vat: ''Ma venga şarê xo danê ke tewrê Meclîsê Leşkerî bibê û erdê xo bipawê. Dewleta tirke têna hêrişê yew kesî yan zî yewn bawerî nêkena; hêrişê her kesî û pêro bawerîyan kena.Wazena ke erdê ma ma ra bigêra. Ma sey ciwananê herême seba ke vera îşxalkeran têkoşîn bikerê ameyî pêser.  Heta ke ma îşxalê dewleta tirke  biqednê, qesasê şehîdanê xo bigêrê û îşxalkeran erdê xo ra bivejê ma do têkoşînê xo dewam bikerê.''