Hemserekê Komîteya Weşîye Dr. Ciwan Mustafayî bale ante tehlukeyê peydabîyayîşê nêweşanê vîrusê Korona yê Rojawan de û pare kerd ke înan goreyê îmkanê xo amadekarîya xo kerde, tedbîrê xo girewte. Dr Mustafayî vat: ''Îmkanê ma çin o ke ma verê vîrusêkê winasênî bigêrê.''

Hemserekê Komîteya Weşîye Dr. Ciwan Mustafayî ANFyî reyde qisey kerd.

Dr. Mustafayî vist vîrî ke Rojawan 9 serrî yo ke mîyanê şerî de û dormegirewte yo û vat: ''Dima ke janê vîrusê Korona resa Rojhelatê Mîyanênî ma berê sînorî girewtî. Herême de mabênê şaristanan de raywanîye ameye vindertene. Qedexeyê vejîyayîşê teberî dewam keno. Karê dezenfekte yenê kerdene, ma goreyê îmkanê xo amadekarîya xo kerde, sayê tedbîranê ke ameyî girewtene heta nika herême de vîrusê Korona nêame tesbîtkerdene. La îhtîmal esto ke vîrus tîya de bêro dîyene. Malzemeyê ma yê tibîyî, personelê weşîye û îmkanê ma kêm ê. Îmkanê ma çin o ke ma vera vîrusî vinderê.

Nêweşxaneyanê taybetan ra berî 14 nêweşxaneyê Îdareyê Xoserî esto. Nêweşxaneyî goreyê şert û mercanê herême û ganîyîyan ameyî amadekerdene. Nêweşxaneyî û servîsê lezabezî 24 saetan xizmet danê.  Nêweşxaneyan de 40-200 personelî xebitîyenê. Netîceya  karêkê hemparî ya Komîteya Weşîye û dezgehê PISî yê Swêdî de kîtêk ame viraştene ke vîrusê Korona tesbît keno. Seba ke ma nê kîtan berê herême xîret kenê. Semedo ke herême dormegirewte ya û sînorê welatî girewte yê, meseleyî estê. Na meseleya tewr pîle ya.''

Dr. Ciwan Mustafayî ard ziwan ke heta nika Rêxistina Weşîye ya Dinya hetkarîya înan nêkerde. Dr. Mustafayî derheqê reşwa kampan de nê çîyî vat: ''Vîrusê Korona mîyanê qerebalixî de zaf lez vila beno. Kampan de se hezar merdimî estê. 70 hezar kesî (zafê înan keyeyê DAÎŞî yê Kampa Holî de yê. Kampa Holî cayêko bitehluke yo.''

Dr. Ciwan Mustafayî kerdişanê dewleta tirke ser o vat: ''Goreyê zanayîşanê peyênan ê ke resayî detsê ma Nêweşxaneyê Roje yê Serêkanîyê de merkezêkê karantîna seba kesanê ke pê vîrusê kewtî ame amadekerdene. Kesê ke pê vîrusî kewtî uca de yê. No seba herême tehlukeyêko pîl o, dewleta tirke sûc kena. ''