'Operasyonê Birûska Cizîre' yê QSD û Hêzanê Asayîşê Zereyî vera cerganê DAÎŞî 29ê kanûne ra nata dewam keno. Serekeşîranê ereban ê herême derheqê operasyonî de ajansê ma rê qisey kerd.

Şêxê Eşîra Alî Huseyîn Muhammed Sultano ke Qebîleya Cîbûrî ra yo vat: ''Ma vera cerganê DAÎŞî û hêrişanê dewleta tirke weriştê we. Cergê DAÎŞî xo mîyanê şarî de nimnenê. Ma nê operasyonî ra kêfweş ê û paştî danê ci. Seba ke QSD vera DAÎŞî şer keno dewleta tirke hêrişê ci kena. QSD domananê ma ra yeno pê û temamîya Sûrîye xelisnabî. Ma tim hetê QSDyî de yê. Dewleta tirke ma rê vanê 'terorîst' la a bi xo terorîst a. Dewleta tirke wazena pêro herêmanê ma îşxal bikera. Vera ney ganî ma yew bibê û pîya têbigêrê.''

Şêxê Eşîra Xetabî yê Qebîleya Cîbûrî Hac Ahmed Xalef Al Hûvedîrî vat: ''Dewleta tirke û DAÎŞ vera herême têgêrenê. No operasyonê QSDyî lazim bi, xêrê ney ra herêma ma do hîna biba asayî. Ma operasyonî nêzdî ra teqîb kenê. Seba cuyêka hempar û asayîye operasyonê QSDyî do dewam bikero.''

 Şêxê Eşîra Xetab a ser bi Qebîleya Cîbûr Davûd Mûhammed Al Hadirî vat: ''No operasyon waştişê şarî ser o dîya destpêkerdene. Reqa û cayanê bînan de DAÎŞî çend hêrişî kerdî. Ma hetê hêzanê xo de yê. Seba ke hêrişê îşxalî yê dewleta tirke bênetîce mendî hucreyê DAÎŞî yê nimiteyî kewtî dewre. Cergî aramîya herême xeripnenê. Ma QSDyî rê sipas kenê ke herêma ma keno pakî.''