Dewleta tirke ya îşxalkere vera Rojawanî hêrişê xo zêdînayî. Îşxalkerî  Hesekê, Amûdê, Til Temir û qezaya Çilaxa ya Qamişloyî dayî bombayan ver. 

Saetanê serê sibayî ra nata Hesekê  binê hêrişan de ya. Taxa Mişêrfa de nêzdîyê îstasyonê Himê wesayîtêk dîya bombayan ver. Dîya zanayene ke nê  hêrişî de kes/kesan dinyaya xo bedilnaye la detayê ci hema safî nêbîyî.

Dima ra dormeyê Kampa Waşûkanî dîyayî bombayan ver. Na kampe hetê Îdareyê Xoserî ra semedê kesanê ke rîyê îşxalê Serêkanîyê bizor erdê xo ra bîyî, amebî ronayene û verî zî çend rey raştê bombardumanî amebî.

Reyna qezaya Çilaxa ya Qamişloyî zî dîyayî bombayan ver la derheqê netîceya hêrişî de zanayîş nêame girewtene.

Dewa Til Hebeşî ya Amûdê zî dîyayî bombayan ver. Goreyê zanayîşanê verênen kes/kesan dinyaya xo bedilnaye û birîdarî est ê.

Dewa Tewile ya Til Temirî zî hetê droneyê çekdarî yê dewleta tirke ra dîyayî bombayan ver.

Dewleta tirke bi hewayêkê sîstematîkî sîvîlan û binsazîyan dana bombayan ver. Hêrişê ke cuyeya sîvîle yena hedefgirewtene de çend serranê peyênan de bi desan sîvîlî ameyî qetilkerdene. 

Hukmatê tirke narey eşkera îlan kerd ke ê sûcê şerî do bikerê. Wezîrê Karanê Teberî Hakan Fîdanî eşkera vat ê  ê do heme binsazîyan û sersazîyan, tesîsanê enerjî hedef bîgêrê.