Operasyonê Hêzê Sûrîyeya Demokratîke (QSD) ke vakur û rojhelatê Sûrîye de semedê azadkerdişê Hecînî yê Dêra Zorî yeno viraştene roja 50. de dewam keno. Vervatoxa QSDyî Lîwa Ebdullahe operasyonê ‘‘Firtineyê Cizîrî yê Hemleya Qedînayîşê Terorî‘‘ ANFyî rê ercna.

Ebdullahe vist vîrî ke operasyonê înan 10ê Êlule de dest pêkerdo û va: ‘‘Hedefê hemleya ma rojhelatê Firatî ra pakkerdişê DAÎŞî yo. Hemle çar qolan ra dest pêkerd. Waştişê ma herêmanê Hecîn, Sûsa, Şefa, Ebû Xaser û Ebû Hesenî çeteyan ra pakkerdiş o. Heta DAÎŞ temamî nê herêman ra bêro raqilnayîş û tebereştiş operasyonê ma do dewam bikero.‘‘

NÊ ROJAN DE ŞERR GIRAN O

Ebdullahe ard ziwan ke rojanê peyênan de rîyê firtineyê qûmî ra pêkewtişê giranî yenî ciwîyayene û wina domna: ‘‘Nê rojan de şerr zaf giran o. Xeylî nuqteyan de pêkewtişî estî. Tayî şerwanê ma şehîd kewtî û birîndarê ma zî estî. Embazê ma ke şehîd kewtî zafê înan bi xo zulmê DAÎŞî antibi coka  semedê xelisnayîşê sivîlan  û peynîya zilmê çeteyan ardişî xo kerdî feda.

HEMLEYANÊ TEWR GIRANAN RA YEW O

Ebdullahe qiseykerdişê xo rê wina dewam kerd: ‘‘Hîrê rojanê peyênan de tewr tay 80 çeteyî ameyî kiştene û xeylî wesayîtê zirxinî û wesayîtê bombebarkerdeyî ameyî îmhakerdene. Firtineyê qûmî hemleye ser o tesîro xirab kerd la rixmê naye hemle bi serkewtişî dewam kena. Hêzanê koalîsyonî zî hewayî ra dayo mewzîyanê çeteyan ro. Na hemleyanê tewr giranan ra yew a. Semedê çeteyan tîya dingo peyên o.‘‘

 HERÊME DO ÎRADEYÊ SIVÎLÎ RÊ BÊRO TESLÎMKERDENE

Ebdullahe da zanayene ke pakkerdişê çeteyan ra dima ê herême teslîmê îradeyê sivîlî kenî û qiseykerdişê xo wîna qedîna: ‘‘ Senî ke cuwa ver herêmanê bînan de zî  sey Reqa, Tebqa û Minbicî de  îdareyêk ame ra, tîya de zî do sey nînan bibo. Hêzê Sûrîyeya Demokratîke seba hekîmbîyayîşê cayêkî nêameyo ronayene.‘‘