Vervatoxê YPGyî Nûrî Mehmûdî gefê hêrişî yê dewleta tirke, peymana adirbirnayîşî ya teşrîna verêne ya 2019î, tewirê welatan ê garantoran ANFyî rê ercnayî. Qiseykerdişê Mehmûdî ra beşêk wina yo:

''Seke zanîyeno ma DAÎŞ hetê cografîkî ra qedîna. La wextê hêrişê Efrîn, Serêkanîyê û Girê Sipî de Hacîn, Baxoz û Dêra Zorê de dewleta tirke xîret kerd ke DAÎŞî gandar bikerê. Nê xîretan emrê DAÎŞî kerd derg. Serekkomarê Tirkîya Erdogan û Wezîrê ci Hulusî Akar îdîa kenê ke herêma ma ra vera înan hêriş ameyo kerdene. No raşt nîyo. Eqsê ci Tirkîya 6 mengan de 306 reyî bi top, hawan, obus û teyarayanê şerî hêrişê Eyn, Îsa, Girê Sipî, Til Temir, Zirgan û herêmanê bînan kerd. Dewleta tirke û cerganê DAÎŞ, El Qaîde, El Nûsra û Birayanê Misilmanan 16 reyî hêriş kerd, ma pêro hêrişê înan şiknayî.

Hêrişanê 6 mengan de 4ê ci domanî, 3ê ci cinîyî 8 sivîlî birîndar bîyî. Êlule de 194 hêrişî ameyî kerdene, 5 sivîlî merdî, 6 sivîlî birîndar bîyî. A raşte dewleta tirke hêrişê ma kena. 17ê teşrîna verêne ya 2019î de bi garantorîya Amerîka û 22ê teşrîna verêne ya 2019î de bi garantorîya Rûsya adirbes amebi kerdene. La Tirkîya qetî goreyê nê peymanan tênêgêraye. Erdogan wazeno sultanîya Osmanîyan bîyaro coka cerganê DAÎŞ û Birayanê Misilmanan xebitneno. Ekonomî û sîyasetê Tirkîya bin şîyê la Erdogan şovenîzm keno û ameyoxê xo şer de vîneno.

Nika Erdogan wazeno newe ra vera Rojawanî şer bido destpêkerden û bi nê hawayî emrê îqtîdarê xo derg bikero. Eke şerêko winasên biqewimîyo semedê pêro şaranê Rojawanî tehluke virazîyeno û no şer do hêvî bido cerganê DAÎŞ, El Qaîde, Birayanê Misilmanan. Xora cara dewleta tirke paştî dana nê cergan, înan fînanse kena.

Eke şerêk biqewimîyo hêzê ma do çarçewa pawitişê meşrûyî de têbigêrê. No şer do sey şerê Efrînî û Serêkanîyê nêbo. Hêzê ma do bi hawayêkê giranî erdê xo, şarê xo bipawê. Pêro dinya zanena ke ma hêrişê kesêkî nêkerdo. La vera hêvî, welat, armancanê ma hêrişî yenê kerdene. Xora projeyê Îdareyê Xoserî yê Rojawanî semedê pêro Sûrîye projeyêko girîng o. Pêro şarê Sûrîye pê hêvîdar o. Erdogan û partîya ci Îdareyê Xoserî verê armancanê xo de sey astengî vînenê coka hêrişê ma kenê. Ê armanc kenê ke nê projeyî bi temamî çin bikerê û sey DAÎŞî merkezê terorî awan bikerê.''