Hemşaredara Pêroyî ya DEM Partî Tulaye Hatimogullari Wan de çalakîya protestoyî ya vera xespî de vat, ''senî ke yewna welat bêro îşxalkerdene, Wan îşxal bîyo.''

Wan de badê rayraşîyayîşê ke verê banê DBPyî ra heta Kuçeyê Cumhurîyetî ame kerdene û raştê polîsan ame, Hemşaredara Pêroyî ya DEM Partî Tulaye Hatimogullari qisey kerd.

Hatimogullari nê vatî: ''Hetêkî ra prosesê dîyalogî yeno rayraberdene hetê bînî ra qeyûm nîno qebulkerdene. 15ê sibate de Birêz Abdullah Ocalan bi komployî ame ardene Tirkîya. Wîna roja tarîxî de bi zanayîşî Hemşaredarîya Bajarê Pîlî ya Wanî de qeyûm ame cakerdene. Şima çend  erd û hewayî ra hêriş bikerî, bi teyarayan serê ma ra bigerê, vera îradeyê şarî kurdî û hêzanê demokrasîyî qeyûm ca bikerî zî ma do tim vajê haştîye. Semedê ma şaredarîyî çar dêsî nîyê. Semedê ma şaredarîyî kuçe yo, şar o. Semedê ma şaredarîyî cinîyî, ciwanî, mayê haştîye yê. Ma do sey vizêrî ewro zî xover bidê.''

Hemserka Pêroyî DBPyî Çigdeme Kiliçgun Uçar zî vat:  ''Hemşaredarê ma seba ke sûcdarê nê, seba ke ameyî vîjnayene erzîyenê zîndanan. Wan de zulmo gird qewimîya la xoverdayîş hinî bîyo tradîsyon.  Şarê kurdî şaredarîyan fîneno dest, parlamento de ca geno û vano ke ma hîmî çarserîya meseleya kurdan wazenê. Şarê kurdî û tirkî dewlete ra derheqê çareserî de çîyêk paweno.  Çim û zerrîya ma pêrune eşkerayîyanê Birêz Ocalanî de yê. No xoverdayîş do bi eşkerayîya tarîxîye ya Birêz Ocalanî bireso pê.''

Badê qiseykerdişan şar bi slogananê “Bijî Serok Apo”, “Bê Serok Jiyan Nabe”, “Îmraliyî rê hezar selamî ”, “Abdullah Zeydan anorê ma yo”, “ Ma do bi xoverdayîşî ser bikewê ” û  “Bijî berxwedana gele Wanê” heta verê banê DEM Partî rayra şi.

Wan de xoverdayîşê şarî dewam keno. Taxî gerîyayî binê ablûqa. Polîsî vera şarî çekan şuxulnenê. Goreyê zanayîşanê ke ameyî girewtene 10 hezar polîsan bajar girewto binê ablûqa.