Wezîrê Karanê Teberî yê Sûrîye Velîd Mûallîm hemmeslekê xo yê Çînijî Wang Yîyî dir Pekîn de ronişt.

 Her di wezîran kombîyayîşêkê çapemenîye ya hempare viraşte. Mûallîmî derheqê şerê peyênî yê Îdlibî de vat, “Ma umîd kenê ke mabênê artêşa ma û artêşa Tirkîya de şer nêvejîyo. Tewirê ma yo bipeyme bi nê hawayî yo.”

 Muallîmî heman wextî de vat, “Babeta Tirkîya de persa ke ganî bêro persayene na ya, amaco bingeyên ê Tirkîya çi yo? Ma hemverê grub û organîzasyonanê terorîstan de şer kenê. Dinya heme bê qenaaet ana ke ma hemverê terorîstan de şer kenê. Ma wazenê ke hêzê xerîbî yê ke teberê qanûnan de Sûrîye de yê welatê înan ra vejîyê.“

Rejîmê Enqereyî hewteyê ravêrteyî de îdîa kerdibi ke rejîmê Şamî nuqteya înan a çimdarîye ya ke Îdlib da ya ser o bomba varnaya. Labelê Rûsya dabi zanayene ke waştiş û koordînatî Tirkîya ra ameyê. Hukmatê Tirkî zî eşkerayîya Rûsya red kerdebî.