Endamê Komîteya Hemserekîye ya PYDyî Aldar Xelîlî derheqê hêrişanê dewleta tirke yê vera Rojawanê Kurdîstanî û weçînayîşanê herême de ANFyî rê qisey kerd.

Xelîlî ard ziwan de dewleta tirke û îqtîdarê AKP-MHPyî estbîyayîşê xo çinkerdişê kurdan de vînenê û vat: ''Goreyê nînan eke projeyê Neteweya Demokratîke bêra caardene û kurdî bibê wayîrê heqan û statuyî peynîya tirkan do bêra. Komara Tirkîya bi xo çinkerdişê kurdan ser o ronîyaye. Çunke kurdan heqê xo waştêne. Dewleta tirke se serrî yo bi heman tersî ciwîyena. Coka dewleta tirke wazena îşxalê xo hîra bikera û pêro erdê kurdan bivisna destî. Ewro dewleta tirke erdê ma yê Rojawanî de şer kena û wazena nê şerî hîna xorin bikera. Dewleta tirke seba ke erdê xo hîra bikera û kurdan çin bikera hêverî çim visto Rojawan û Başûrê Kurdîstanî.

Destpêkê Wisarê Şaran ra nata dewleta tirke xîret kena ke tîya de îdareyêko xoser nêro awankerdene û Sûrîye demokratîk nêba.Tirkîya her cayî ra cergan ana û bi nînan vera şerwan û gerîlayan şer kena. Nê cergî Efrîn, Girê Sipî û Serêkanîyê de şuxilîyenê.''

Xelîlî bale ante weçînayîşanê herêmanîyan ser û vat: ''Seke şima zî zanenê şaranê Rojawanî ra bi 158 kesan komîsyonêk ame awankerdene û Peymana Komelkîye ameye viraştene. Goreyê na peymane bire dîyaye ke weçînayîşê herêmîyî bêrê kerdene û îdareyanê herêmîyan de vurîyayîşî bêrê kerdene. Teyna bi partîyêke îdare nêbeno. Seba ney zî ganî beşê komelî kom bibê û şaredarîyanê xo awan bikerê. La dewleta tirke û hemkarê ci ney qebul nêkenê. Dewleta tirke hende weçînayîşanê ma yê herêmîyan ra tersena. Çunke nêwazena ke meseleyî çareser bibê û şar bi weşî bêro îdarekerdene. 

Ma amadekarîyê weçînayîşan qedînabî la tay kêmasîyî eşkera bîyî. Heyetê Weçînayîşî yê Berzî yê Îdareyê Xoserî zî bire daye ke weçînayîşan taloqê tebaxe bikero. Ganî nê weçînayîşî bi hawayêkê demokratîkî bêrê kerdene û bibê mîsalê demokrasîyî.''

Xelîlî vist vîrî ke 25ê hezîrane serrgêra hêrişanê DAÎŞî yê vera Kobanê yo û vat: ''Xoverdayîşê Kobanê vurnayîşî pîlî viraştî. Bi hêz û merkezê vurnayîşî. Ez pêro şehîdanê Kobanê bi rêzî yad kena. Bi taybetî înanê ke koyan ra xo resna Kobanê û bi fedayîtî şer kerd, tarîx vurna. Nê xoverdayîşî ra nêbîyêne netîce do giranêr bibîyêne. Ganî ma tim ruhê xoverdayîşê Kobanê pîlêr bikerê. Ma ganî bi nê ruhî nêzdîyê karê xo bibê. Hema zî dişmen hêriş keno. Eke ma vera hêrişan bi ruhê Kobanê têkoşîn bikerê ma do hinî bieşkê destkewteyanê xo bipawê.''