Endamê Konseya Hemserekîye ya PYDyî Aldar Xelîlî cewab da persanê ANFyî.

Xelîlî da zanayene ke têkoşînê înan ê vera DAÎŞî her aste de dewam keno û vat: ''Beno ke serê erdî de serdestîya ci ameye qedînayene la DAÎŞ bi xo hema nêqedîya. Bi taybetî nê helan DAÎŞî xo zaf rêxistin kerdo. Hucreyê ci yê nimiteyî estê. Hêzê Asayîşî wezîfeyanê xo anê ca la şarê herême eba pawitişî ganî her aste de paştî bido. Dewleta tirke bi xo DAÎŞ rêxistin û weye kena. No planê esasî yê DAÎŞî eşkera keno. Herêmanê îşxalkerdeyan de nê cergî yenê perwerdekerdene û hêrişan kenê. 

Dinya vera hemkarîya DAÎŞ û dewleta tirke bêveng manena. Dewleta tirke erdê Sûrîye bi sereyê xo îşxal nêkerdo. Eke îtîfaqê hêzanê hegemonîkan ra nêbîyêne dewleta tirke nêeşkayêne nê erdî îşxal bikera, verê çimanê dinya de Îstanbul de, Dîlok de cergan weye bikera. Eke raşta zî cerganê DAÎŞî ra felat yeno waştene o çax ganî dewleta tirke rê sînorêk bêro ronayene. Heta ke îqtîdarê AKP-MHPyî est bo DAÎŞ do pîl bibo û bibo tehluke.

Hêrişê dewleta tirke yê vera herême zêdîyayî. Dewleta tirke qesasê DAÎŞî gêna, wazena projeyê demokratîkî çin bikera, mabênê şaran de kaos viraza û verê sîstemê ma yê demokratîkî bigêra. Ma zî xîret kenê xo bi xurtî xo rêxistin bikerê û sîstemê xo yê pawitişî aver berê.

Rejîmê Şamî xo nêdano çareserîye, dîyalogan qebul nêkeno. Wextê hêrişanê vera Hesekê de zî eşkerayîyê rejîmî zelal nêbîyî. Ma nêvanê ke 'to na eşkerayîye daye, hînî ma nêeşkenê pîya ronişê.' Ma ney mesele nêkenê. Ganî ma raştîye bivînê. Raştîye na ya ke ganî ma pîya welatî bipawê. Ma nê welatî aram bikerê.''