Endamê Heyetê Rayberdişî yê Têgêrayîşê Komelê Demokratîkî (TEV-DEM) Aldar Xelîlî rewşa peyêne ya Rojawanî ANF rê ercnaye.

 Xelîlî  vat: ''Rûsya do nêverda ke Tirkîya Îdlîb de aver şêra û Rûsya hînî vetişê dewleta tirke Sûrîye ra vist rojdemê xo. Efrîn, Girê Sipî, Serêkanîyê, Cerablûs, Ezaz, Bab pêro ameyî îşxalkerdene û ganî bêrê azadkerdene. Bi taybetî ma giranîye danê azadîya Efrînî ser. La tay serebûtanê sey şerê Îdlîbî ra ma yewbineyk seba azadkerdişê Efrînî erey kewtî. Erdogan wazeno bi îşxalê Îdlîbî parçeyanê bînan ê Efrînî zî îşxal bikero la no mumkîn nîyo çunke Erdogan vera Rûsya de bi qels. Ganî ma na rewşe rast biercnê û vera îşxalkerîye cade têbigêrê.

Rejîmê Sûrîye seba dîyalogan nîşanê pozîtîfî dayî. Ma naye zî vatişanê selahîyetdaranê Rûsan ra eşnawenê. No nîşanêk o. Yanî çîyo winasên çin o ke ma her çi temam kerd, îtîfaq kerd û çareserîye bîye. Labelê qebulkerdişê dîyalogan û pêvînayîşan zî gamêka musbet o. Heta ke meseleya kurdan çareser nêba Sûrîye zî demokratîk nêbena. Ma nika nêeşkenê ke ma babetanê falan û bêvanan ser o pêkerd la xîretê dîyalogan do dewam bikerê. Seba caardişê dîyalogan hêvîya ma esta. Hewceyê ma bi çareserîya sîyasî esto.

Derdê ma awil şîyayîşê Cenevre û viraştişê çarserîyêk o. Eke ma Şam de pêbikerê  û Şam Îdareyê Xoserî nas bikero çîyê sey Cenevre hînî mesele nêbenê. Prosesê nuştişê qanûnê bingeyî de ganî ma bibê, vînayîşê ma bibê. Metno ke bêestbîyayîşê Îdareyê Xoserî de bêro nuştene do seqet bibo. Ma wazenê ke ma herinda şerkeridişî de rejîmê Şamî de bibê mutefîq. Serkewtişê sîyasî yê Îdareyê Xoserî seba herêmanê bînan ê Sûrîye bi modelê xurtkerdişê yewbîyayîşê welatî.''