Hemserekê  Têgêrayîşê Cimatê Demokratîkî (TEV-DEM) Xerîb Hiso yo ke derheqê tehdîtanê Erdoganî yê vera Rojawanî de ANF’yî rê qisey kerd, vat eşkerayo ke Erdoganî qerarê şer û qirkerdişî girewto û ê zî do xover bidê.

Xerîb Hisoyî tehdîtê Tirkîya sey planê hêrişî yê hemparî yê Tirkîya, Sûrîye, Rûsya û Îranî name kerd û sere de şarê Kurdî heme şarê herême ra waşt ke wa semedê xoverdayîşî yew bê. Hisoyî vist vîrî ke Erdogan goreyê qanûnanê mîyanneteweyî bi vengdayîşê qirkerdişî suc keno û va: ‘‘Çi heyf o ke kes vera nê tewiranê ey vengê xo nêvejeno. Seba ke înan heta ewro çi kerdo hetê înan de mendo, ci ra hesab nêameyo persayanê ewro zî wina hêriş kenê. La ma do vera înan heta peynî xover bidê. Erdoganî semedê şarê Rojawanî qerarê qirkerdişî girewto. Wazenê ke bi hêrişanê Rojawanî krîzanê xo çareser bikerê la xelet ê çareserîye krîzanê înan Tirkîya de yê. Şarê ma vera îşxalan payra yo. Wa herkes bizano ke ma do xover bidê. Nê hêzê ke semedê menfeatê xo nika  paştî danê Erdoganî ê do xo mîyan de bikewe têmîyan. No semedê rejîmê Sûrîye zî tehluleyêko gird o.‘‘

Hemserekê TEV-DEM‘î Xerîb Hisoyî veng da şarê Kurdî û vist vîrî ke Erdogan wazeno ke ça de beno wa bibo heme Kurdan çîn bikero,coka vera naye Kurdî zî ça benê wa bibê ganî vera tehdît û hêrişanê hukmatê Erdoganî xover bidê û vengê xo berz bikerê. Hisoyî veng da Neteweyê Yewbîyayeyî, Yewîya Ewropa, Yewîya Ereban ke wa nê tehluleyê girdî vînî û vera naye bêveng mevindê û vat ganî hînî faşîzmê Erdoganî bêro vindarnayene.