Fermandarîya YBŞyî derheqê hêrişê droneyê çekdarî yê vera wesayîtêkê înan de eşkerayîye daye. Eşkerayîye wina ya:

''Artêşa tirke ya îşxalkere ewro saete 09.30 û 10.00 de wesayîtêkê ma pê droneyê çekdarî kerd hedef. La hêriş de zerarêk nêresayo hêzanê ma ser.

Artêşa tirke vera şaranê herême bi taybetî vera êzidîyan hêrişê xo zêdînayî. Dewleta tirke metodê xo vurna û vera şarê ma yê qedîmî tim droneyanê çekdaran şuxilnena. Eşkera yo dewleta tirke wazeno qirkerdişo ke DAÎŞî nêmcet verdabi temam bikero. Bi nê hawayî dewleta tirke wazena çimê şarê ma bitersna, şarê ma bêîrade û bênasname verbida. 

Şarê ma wa vera nê hêrişan hayidar bibo û wurzo we. Şarê ma wa vera îşxalker û qirkeran xo rêxistin bikero. Ma soz danê ke qesasê şehîdanê xo bigêrê û şarê xo bipawê. Ma do heta peynî vera îşxalkeran xo ver bidê û têkoşînê xo pîlêr bikerê. ''