Fermandarîyanê Pêroyîyan ê YPG-YPJyî bi eşkerayîyan serrgêra 10. ya Şorişê Rojawanî yê 19ê Temmuze fîraz kerde.

Eşkerayîya YPGyî wina ya:

''Şorişê Rojawanî serê kokanê paradîgmaya Rayber Apoyî de bi keda bi hezaran şehîdan 10 serrê xo temam kerdî. Qet yew şoriş sey Şorişê Rojawanî hende zehmetîyan de têrî nêmendo. Coka şorişê ma tek mîsal o. Rixmê kêmîyan û hêrişan de şorişê ma xo ver da û paradîgmaya azadîye her ca de vist dewre. Şorişê Rojawanî texmînan ra zêdeyêr xo resna dinya. Bi taybetî şerê ma yê vera DAÎŞî kerd ke bi seyan ciwanê dinya tewrê YPG û YPJyî bibê. Bi desan ciwanê enternasyonalîstî şerê ma yê vera îşxalkeran de wextê peyênî de şehîd bîyî. Ma bi na wesîle nê şehîdan zî bi rêzdarî yad kenê.

Pêro dinya de têna Şorişê Rojawanî sey şorişê cinîyan yeno pênasekerdene. Cinîyî bi felsefeya Rayber Apoyî bîyî serkêşê Şorişê Rojawanî. Cinîyî pê awankerdişê hêzê xo yê leşkerîye zî mîyanê Îdareyê Xoserî de bi aktîfî têgêrayî. Cinîyan komelê Rojawanî xeta ekolojîk, demokratîk û azadîya cinîyan de perwerde kerd. Xeylêk meseleyî rojawan de serkêşîya cinîyan de ameyî çareserkerdene û no zî seba pêro dinya bi alternatîf.

Verê ma de hema zî zaf meseleyî est ê ke ganî bêrê çareserkerdene. Destpêkî ra nata Şorişê Rojawanî hedefê dewleta tirke de yo. Şarê Rojawanî yê sey ereb, kurd, tirkmen, armenî ûsn. seba ke îşxalê dewleta tirke û cerganê ci ra bixelisê mîyanê xoverdayîşêkê pîlî de yê. Ma reyna soz danê şaranê xo ke qetî serkewtişê azadîye bîyarê ca û Şorişê Rojawanî mende bikerê. Ma reyna 10 serrîya Şorişê Rojawanî fîraz kenê. Ma pê bawer ê ke bi têkoşînê ma, ma bi şaranê xo xeylêk serkewtişan fîraz bikerê û destkewteyanê pîlan bivisnê destî.''

Eşkerayîya YPJyî wina ya:

''19ê Temmuze vera îşxal, kolonyalîzm, bêedaletî û netêdûştîye qîrayîşê cinîyan, ciwanan û pêro komelî yo. Şorişê 19ê Temmuze qerardarîya azadîya şaran a ke serkêşîya cinîyan de erdê Rojawanî de cuyêka newîye afernaya. Serewedarnayoxanê kurdan bi felsefeya Rayber Apoyî û bawerîya fikrê neteweya demokratîke Rojawan de alaya xoserîye berz kerde û mîyanê 10 serran de rixmê hêrişan zî na ala tim berzêr bîya. Şorişê Rojawanî keda Rayber Apoyî ya.

Têkoşîn û xoverdayîşê cinîyan mîyanê Şorişê Rojawanî de wayîrê cayêkê girîngî yê. Şehîdanê ma yê verênan Silava, Bêrîvan, Rûksen, Jînda, Ozgure ra heta dadîyanê ma yê fedakaran Yadê Gulê, Yadê Eqîde, jinên têkoşer Hebûn, Zehra, Amîna, Hind û Saada û şehîdanê enternasyonelan Lêgerîn (Alina Sanchez), Hêlîn (Anna Campbell), Avaşîn (Îvana Hoffman), Sarya Bulut, Ceren Guneş cinîyan nê şorişî de bedelî dayî û ganê xo feda kerdî.

Serrgêra 10. ya Şorişê 19ê Temmuze de ma venga pêro şaran, cinîyan û komelanê Rojawanî danê ke wayîrê destkewteyanê şorişî bivejîyê, vera hêrişanê îşxalkeran mesuldarî bigêrê xo ser û hemleya înşa û pawitişê şorişî de ca bigêrê. Nê prosesê hêrişan de ganî pêro şarî dormeyê şorişî de yew binê, xo vera hêrişan amade bikerê, hetkarîya şerwanan bikerê û wayîrê şorişî vejîyê.  Wayîrvejîyayîşê Şorişê 19ê Temmuze erkêkê merdimîye yo. Nê rojan de ke gefê Erdoganî yê vera herême zêdîyayê, wa pêro rayaumûmîye û dinya bizanê ke ma do şarê xo reyde bedelê ci se beno wa bibo erdê xo bipawê.

Sey hêzanê YPJyî ma senî ke tarîtîya DAÎŞî qedînaye do ewro zî vera hêrişanê serê şorişî xo ver bidê. Ma embaz û şerwanê winasên ê ke wayîrê erkê pawitiş û pîlkerdişê şorişî yê. Senî ma Rojawan de çeperî kerdî de û şoriş awan kerd ma do seba pawitişê şar, cinîyan û şorişê xo bi heman ruhî xo ver bidê, şorişê xo pîl bikerê û ser bivisnê.''