Dewa Baxozî ya girêdayeya Dêra Zorî de, vera çeteyanê DAÎŞ’î operasyonî hîna zî yenê domnayene û bi nê operasyonan hezaran cinîyî û doman ê Êzîdîyan, hetê hêzanê QSD’yî ra ameyî raxelesnayene. Fermandara YPJ’yî Arîyan Qamişloye, derheqê raxelesnayîşê cinî û domanan de qisey kerd. Qamişloye va no şer seba înan zaf muhîm o û wina dewam kerd: ”Çunke Baxoz de cinîyê Êzîdîyî hîna zî estê. Hedefê ma o yo ke, pêro cinîyê Êzîdîyî yê ke hetê DAÎŞ’î ra ameyê remnayene, ma raxelesnê.”

Qamişloye va wahşetê DAÎŞ’î yê cinîyan ser, bi qiseykerdişê cinîyan ê Êzîdîyan dolimêna bîyo eşkera û wina dewam kerd: “Vizêrî yew cinîya Êzîdîye ya ke ameye raxelesnayene va, des kesan de bi zorî ameya zewecnayene, ziwan, kultur û dînê aye dayo vîrîkerdene. DAÎŞ bi nê qeydeyî hafizaya merdiman xerepneno û wextê verî dano vîrîkerdene.”

Qamişloye va YPJ’yî bi mucadeleyê xo komelî ser tesîr dayo girê û wina va: “Herême de xeylî cinîyî beşdarê YPJ’yî bîyî û nika Baxoz de vera DAÎŞ’î şer kenê. DAÎŞ doman û cinîyan sey mertalo ganî şuxulneno. No sebeb ra ma zaf bi baldarîye têgêrenê. Rojanê verê ma de, ma do cayanê destê DAÎŞ’î bigîrê.”