Yûsife: Ma pêro îmkanê xo seferber kerdî

Endama Konseya Rayberdişî ya PYDyî Hedîye Yûsif bale ante ser ke wextêk de ke pêro dinya vera vîrusê Korona têkoşîn keno dewleta tirke hêrişê Rojawanî û Şehba kena û vat  seba pawitişê şarê Rojawanî înan pêro îmkanê xo seferber kerdî.

Endama Konseya Rayberdişî ya PYDyî Hedîye Yûsif derheqê hêrişanê dewleta tirk yê vera Rojawanî û Şehba û tehlukeyê vîrusê Korona de ANFyî reyde qisey kerd.

 Hedîye Yûsif  vat: ''Dewleta tirke wazena ke projeyê ganîkerdişê dewleta osmanîyan bîyara ca. Zemînê krîzê Sûrîye xurtêr kerd. Welatê xo de teror kerd, cergî perwerde kerdî û hêrişê Sûrîye kerd. Tirkîya nika krîzêkê pîlî reyde rî bi rî mende. Vîrusê Korona Tirkîya de vila beno, meseleya Sûrîye de Tirkîya xeniqîyaye, meseleya Îdlîbî, yê cergan, vînkerdişê ci yê Lîbya. Tirkîya nînan do senî çareser bikera? Naye ra Tirkîya qels bîye.

Hetê bînî ra dewleta tirke hêrişê Rojawanî kena. Koçberîye dewam kena. Hêrişê Şehba dewam kena. Vakurê Kurdîstanî de hêrişê şaredarîyanê kurdan kena. Rewşêka winasêne de ke pêro dinya vera vîrusê Korona têkoşîn kena, dewleta tirke hêrişanê xo dewam kena. Bi nê hawayî AKP xîret kena ke îqtîdarê ci dewam bikero. 3 rojan ra nata vejîyayîşê teberî qedexe yo. Îmkanê ma kêm ê, çîyê ke ma eşkenê Şehba de kenê kêm ê. Bi rayîrê sîstemê komunî ma xîret kenê ke hewcedarîyanê şarê xo peyda bikerê. Semedo ko serdestîya dewlete bazaran ser o çin a her çî zaf bîyî vay. Reyna zî seba weşîya şarê xo ma pêro îmkanê xo seferber kerdî.

Vera nêweşîya Korona ma 3 noqtayî awan kerdî. Ma şarî rê hacetê pakîye û dezenfekte vila kerdî. La nê tebdîrî kêm û qels ê. Çunke tîya warê şerî bi û xora zemînê her nêweşîye tede estê. Hema zî herême de madeyê kîmyewîyî estê. Binê bînayanê rîjîyayeyan de meyîtî estê. Seba ke ma nê rîskî werte ra wedarê ma pêro bînayan û keyeyan dezenfekte kenê.Ez venga pêro dezgehanê weşîye yê mîyanneteweyîyan danê ke seba ke nêweşîye vila nêba paştî bidê ma.''