Endama Konseya Hemserekîya PYDyî Foza Yûsiv bi wesîleya serrgêra Şorişê Rojawanî ANFyî rê qisey kerd. Yûsive vat bi yewbîyayîş û pawitişê destkewteyan gerek şorişî rê wayîr bêro vejîyayene.

Qismê diyînî yê roportajê Foza Yûsîv ra tayî cayî wina yê:

''Taybetîya nê şorişî oyo ke xeylêk cinîyî tewrê ci bîyî û ci rê serkêşîye kerde. Cinîyan sîyasî ra heta pawitiş û waranê kulturkî de rolêko pîl kay kerd. Tay cayan de tewrbîyayîşê cinîyan se de 50 bi. Mesela sîstemê hemserekîye dinya de reyna verêne Rojawan de ameye caardene ke semedê heme rêxistinanê cinîyan ê dinya gamêka şorişgerê û modelêk o. Nika Rojawan de heme komîn û meclîsan de sîstemê hemserekîye esto. Reyna warê pawitişî de zî YPJ, Asayîş, HPC rolêko tarîxî ard ca. Heme waranê xoverdayîşî yê qedînayîşê DAÎŞî de cinîyan rolêko pîl kay kerd.

Tesîrêko bîn zî keyeyan de bi, bedilnayîşê pîlî ameyî ciwîyayene. Hetê komelkî ra zîhnîyetê camêrdê serdestî ame wedartene û herinda ci de sîstemêko demokratîk kewt dewre. Pîya bi şorişê sîyasîyî şorişo komelkî ame ciwîyayene. Şorişî tekîlîya cinî-camêrd û keyeyî ser o tesîro pîl kerd. Game pîlî û muhîmî ameye eştene la no nîno manaya qedîyayîşê her çîyî. Têkoşînê ma dewam keno.

Cayê ke ameyî îşxalkerdene seserre peyde ameyî berdene. Sere û mezgê cinîyan ameyî qefilnayene û cinîyî ganî-ganî ameyî definkerdene. Efrîn, Girê Spî û Serêkanîyê de ma nê raştîye dîyî. Ortaxê DAÎŞî tewr zaf azadîya cinîyan hedef kenê. Cinîyan bi şorişê cinîyan û destkewteyanê xo sîstemê zorbayî ra qesasê xo girewt.

Şorişê Rojawanî 2011 de dest pênêkerd. Têkoşînê cinîya kurde 30-40 serrî yo ke dewam keno. Têna nika şertan no têkoşîn fîna çiman ver. Şorişê 19ê Temmuze vera cinîya kole û camêrdê îqtîdarkerî ame kerdene ke semedê cinîyan mîladêko newe yo. Cinîyî hinî camêrdî rê grêdaye nîyê, xoser ê. Rayberîya YPJ û Korgreya Starî de game pîlî ameyî eştene.

Gerek cinî rêxistinbîyayîşê xo pîlêr bikerê, cunku binê tehdîtanê girdan de yê. Hêrişê vera embaze Hevrîne, Yade Aqide, Barîne, Avesta, Zehra, Hebûe, Yade Emîne û hêrişê ke tim vera cinîyan yenê kerdene ramojnenê ke hêzê vera şorişî nê bedilyayîşî nêwazenê û heta ke destê înan ra bêro xîret kenê verê şorişî bigêrê. bi yewbîyayîş û pawitişê destkewteyan gerek şorişî rê wayîr bêro vejîyayene. Azadîye û yewbîyayîşê ma yewbînan rê pabesteyê.''