Koordînasyonê Kongra Starî ra Hedîye Yûsûfa ke dimayê îşxalê Efrînî Şehba de bi şarî manena derheqê tehdîtanê hêrişê Rojawanî yê Tirkîya de ANF’yî rê qisey kerd.

Yûsûfe vat: ‘’ Tirkîya zî zana ka hêrişê vera Vakur û Rojakewtena Sûrîye menfeatê Koalîsyonê Mîyanneteweyîyî yo ke Amerîka ci rê rayberîye kena, nêyo. Bi sebebo ke Tirkîya fuzeyê S-400 girewtî binê zextê Amerîka de ya û xo mîyan de krîzo ke gird ciwîyena. NATO de zî estbîyayîşê ci babete pêrodayîşî yo. Coka bi destkewteyanê neweyan wazena ke zextê serê xo kêmî bikero. Tirkîya zana ke eke naye nika mekero Amerîka û Koalîsyon destûrê hêrişî nêdanê. Eke nika hêriş zî bikero, şer  heme wareyî ra vila beno û destê Rûsya beno bihêz. Vernîya Amerîka û Koalîsyonî de di rayîrî estê. Ya wirzênê şer kenê, yan zî Sûrîye ra vejênê. Nika semedê rayîrêkê mabênî  bivînê, xebityenê.  Ma îxtîmalê hêrişkerdişê Tirkîya nêvînayîş ra nênê. Ma zanê ke o potansîyelê îqtîdarî esto keTirkîya teraşî rê kaş bikero. Coka tedhîtê înan cîddî yê.’’

Yûsûfe wîna dewam kerd: ‘’Netîceya pêkerdişo ke Tîrkîya, Rûsya, Îran û Sûrîye de tede ca gênê Efrîn ame îşxalkerdene. Hêzê ke pîya bi ma vera DAÎŞ’î mucadele kerdêne vera naye bêveng mendî. Efrîn de qetlîam û talan bi. Bi se hezaran kesî cayê xo ra bîyî û nufûsê ci ame bedilnayene. Reyna Dêrazor, Reqa, Minbic û tewr peynî de Baxozî ra DAÎŞijî nika Efrîn de yê. Îmajê xo bedilnenê û amadekarîya şerê neweyî kenê. Planê bêkurdkerdişî bi heme bêdejîya xo dewam keno. Her hele caardişê teberê merdimîye yenê ciwîyayene. Çi heyf o ke heme hêzî vera naye bêveng ê. Seba ke na rewşe Efrînî heme Vakur û Rojakewtena Sûrîye de newe ra mebo ganî amadekarîyêka hîraye, xoverdayîşo topyekûn û xebatê dîplomatîkî bibê.’’

Hedîye Yûsûfe qiseykerdişê xo wina qedîna: ‘’ Rejîmê Sûrîye de cîddîyetê çareserîye çîn o.  Ferq kenê ke Sûrîye ver bi parçebîyayîşî şina.  Zanê ke Tirkîya cayê ke îşxal kerdî û cayanê ke beno ke îşxal bikero ra nêvejîyena. Xora nimûneyê Îdlîbî eşkera ramojneno. Mîyanê rejîmê Sûrîye de zî tayî wazenê ke bi Kurdan û îdareyê xoserî pêkerdiş bikerê û krîzê Sûrîye ra vejîyê. La Sûrîye game nêerzena. Mesela ma Şehba de yê heta ewro Sûrîye destûr nêdo ke nan zî bê gumruk ravêro. Şehba ser re ambargo zî berz nêkena. Ma xora dîyalogî rê amadeyê la ganî rejîm zî cîddî bo.’’