Hemsereka Konseya Rayberdişî ya KCKyî Besê Xozat Medya Haber TVyî de pêvînayîşê bi Rayber Apoyî û prosesê peyê nînan ercnayî.

Qiseykerdişê Besê Xozat ra tayê noqtayê girîngî wina yê:

''22yê çeleyî de ancî heyetê DEM Partî Rayber Apoyî de pêvînayîş kerd.Heyetî vat ke ê do dima eşkerayîye bidê rayaumûmîye. Nika ra atmosferêko pozîtîf virazîyayo. La hema zî îqtîdarî gamêka eşkera nêeşte. Seba ke meseleya kurdan çareser biba û tirkîya demokratîk biba ganî hêverî tecrîd wedarîyo. Şertê cuya azade, xebat, asayîş û weşîya Rayber Apoyî ganî bêrê caardene.

Heta ke nê şerî nêrê caardene Rayber Apo do nêeşko rolê xo bîyaro ca, bi azadî bixebito, venga komelî bido, mesaj bido kurdan. Yanî ganî Rayber Apo bi rehetî veng bido teberî. Mîyanê nê şertanê tecrîdî de Rayber Apo do senî veng bido û senî hukmê nê vengdayîşî bibo?

Mîsalê Mandelayî de zî ma dî ke ey dima ke tecrîdê vera ey wedarîyabi rolê xo ardibi ca. 25-26 serrî yo tecrîdêko mutleq est o. Heta ke no tecrîd nêqedo Rayber Apo do nêeşko bi rehetî bixebito. Wa tecrîd cade wedarîyo. 

 Heqê hêvîye qetî nêbeno babeta bazarîye. Ganî bedelê ney de Rayber Apoyî ra çîyêk nêro waşteneç Eke meseleya kurdan çareser biba şer zî do biqedo, demokrasî do bêro. Îqtîdarê AKP-MHPyî bi şerî gefan waneno. Tayînê qeyûman, destbendkerdişî, tepiştişî, tedayî. Hinî nê tena vera kurdan vera pêro komelî yenê kerdene. 

Rixmê nê tedayan zî mîyanê dewlete de seba çareserîya meseleya kurdan meylêk est o. Rayber Apo zî ney vîneno û wazeno ke bi pêro hêzê xo na mesele çareser bikero. 2005 de zî wina meylêk est bi la o çax îqtîdarê aKPyî waşt ke ney seba menfeatanê xo bişuxilno.

Prosesê 2013-2025î wina bi. Seba ke proseso nikayên o qayde  netîce nêbo ganî ma bi hêzî paştî bido ci Ganî pêro muxalefet, hêzê demokrasî, huqûq, edalet û haştîye paştî bidê xîretanê çareserîye yê Rayber Apoyî.  Bingeyê pêro meseleyan de çaresernêkerdişê meseleya kurdan est o. Muxalefet ganî goreyê ney têbigêro. Ganî kayê îqtîdarî bêrê pûçkerdene. Rayîrê ney zî têkoşîno hempar o.

Rayber Apoyî ra  ma rê mesajêk nêame. Ne mektubêke ne zî mesajêko raştaraşt. La ma wina fikirîyenê  ke do bêro. Eke bêro xora ma do biercê û goreyê ci têbigêrê.  

Heta ke meseleya kurdan bingeyê demokrasîyî de çareser nêba ne çekî do bêrê ronayene ne xoverdayîş do biqedo ne zî têkoşîn do biqedo. Heta ke na mesele çareser nêba ma do şarê xo bêpawitiş nêverdê. Vera kurdan hêrişê qirkerdişî û îşxalî est ê. Eke meseleya kurdan bi demokrasîyî çareser biba o çax ma do her çî ser o qisey bikerê û babeta çekverdayîşî zî do bêra ercnayene.  

Ma nê pêvînayîşanê bi Rayber Apoyî ra fam kenê ke Rayber Apo ho keno ke komelê demokratîkî aver bero. Rayber Apo keno ke tena welat de ney pêro herême de  haştîye bîyaro ca.  Rayber Apo seba ney enerjîyêka pîle xerc keno.

Dewlete hema zî biteredut a. Dewlete bi xo zanena ke rewşe do wina nêşora û bi têkoşîn û xoverdayîşê kurdan nêeşka. Hinî çar hetanê dinya de raştîya kurdan est a û kurdî sey verî nîyê rêxistinkerde yê.  Oyo esas têkoşînê kurdan, ciwanan, cinîyan, şaran û hêzanê demokrasî û şorişî yo. Bi têkoşînêkê hîrayî dewlete zî do net biba û verê xo bida çareserîye.

Eke kurdî yew bibê dîzaynê Rojhelatê Mîyanênî de do bieşkê wayîrê rolêkê girîngî bibê. Ganî kurdî statu û nasnameyanê xo bivisnê destî û dîzaynê herême de rolêkê bitesîrî bîyarê ca. Eke kurdî parçekerde bibê do bin bikewê.Şar seba yewîya neteweyîye amade yo. Ganî partî û hêzê kurdan zî yewîya neteweyîye ser o zelal bibê. Ma tim seba yewîye veng danê û do  bibê. Rojawan de seba ney xîretê qîmetînî est ê. Ma zî amade yê ke seba yewîya neteweyîye bi her hawayî destek bidê.''