Endamê Komîteya Rayberdişî ya PKKyî Murat Karayilanî Kongreya 12ine ya PKKyî de nê ercnayîşî kerdî:

‘’Ma tecrubeyan ra dersî girewtî, kêmasîyê ma est ê la ma wazenê prosesê neweyî fam bikerê. Ez hîsger a; çunke ma zaf bedelî dayî. Ez bawer a ke ma xeta Rayber Apoyî de nê prosesî do ser bivisnê.

Ez vînena ke Rayber Apo bi qerardarî û bi moralî têgêreno. Eke Rayber Apo çîyêkî ra bawer nêkero wina tênêgêreno. Cara ma bi dewleta tirke bawer nêkenê. Pratîkê dewleta tirke eşkera yê la ma bi metod û rayîrê Rayber Apoyî bawer ê.

PKKyî xo îsbat kerdo. Çew nêeşkeno dormeyê ma bigêro û ma bixeniqno. Ma emser kombîyayîşê Konseya Fermandarîye de doktrînêkî ser o bire daye. Ma bi nê doktrînî bawer ê. Ma bi prosesê Rayber Apoyî zî bi nê doktrînî zî bawer ê. Nê do ma berê şerî. Şer bi teknîk, taktîk û pratîkî beno ke nê PKK de, gerîlayan de est ê.

Ma şerê tunelan de, şerê tîman de weste yê. Ruhê hêzanê ma yo Apoyî xurt o, embazê ma fedayî yê. Nika dişmen vano ke ‘PKK qels bîyo.’ PKK tena gerîlayan ra nêno pê. PKK şarêk o, kadroyê ci est ê, bi mîlyonan kesî yo. PKK dewrê xo yê tewr xurtî de yo.

Serranê peyênan de ciwanê ma zî bi ruhê Apoyî afernayîşê metodê şerî de resayî astêke. Ciwanê ma zî teknolojîya dewrê neweyî aver benê. Ma şerê dronan her hetî ra eşkenê bikerê. Verê cû ma erazîyan de şer kerdêne, nika tunelan de zî eşkenê şer bikerê. Verê cû îmkanê ma yê şerê hewayî çin bîyî, nika est ê. Ma eşkenê şerê gerîlayan aver berê.

Ma pabesteyê xet û pespektîfanê Rayber Apoyî yê, ma do xeta Rayber Apoyî de têbigêrê. Ez bawer kena ke na kongre do bira ney bigêra. La eke dewleta tirke rixmê nînan zî hol nêba û şîdet de israr bikera o çax ma do cewabo ke hewce keno bidê ci. Wa her kes naye bizano.’’