Dozgerîya waşt ke versûcê dewaya qetilkerdişê Tahîr Elçîyî wa vera bidîyê.

14 baroyan bi eşkerayîyêka hempare vera waştişî nêrazîbîyayîşê xo mojna.

Eşkerayîya bi sernameyê ''Faîl-î meşhûl nîyo, cînayetêko eşkera yo'' de wina ame vatene: ''Serekê Baroyê Amedî Tahîr Elçî 28ê teşrîna peyêne ya 2015î de amebi qetilkerdene û derheqê versûcan de dewa amebî akerdene. Roniştişê 25ê nîsana 2024î de Serdozgerîya Komare ya Amedî waşt ke wa polîsê versûcî vera bidîyê. Xora heta nika derheqê cînayetê Elçîyî de tehqîqatêko bitesîr nêameyo kerdene. Dewaya Tahîr Elçîyî de game bi game bêcezakerdiş ame awankerdene, kerdoxî ameyî pawitene.

Ma zanenê ke seba roşnîkerdişê cînayetanê sîyasîyan îradeyêko sîyasî yo cidî lazim o. Seke Tahîr Elçîyî vatêne 'Faîlî meçhûl çin o, cînayetê ke nêameyê roşnîkerdene est ê.' Ma sey baroyan waştişê serdozgerîye qebul nêkenê. Ma do prosesê huqûqî tim teqîb bikerê.''

Baroyanê Semsûr, Agirî, Êlih, Çewlîg, Bedlîs, Dêrsim, Colemêrg, Qers, Mêrdîn, Mûş, Sêrt, Riha, Şirnex û Wanî morê xo da binê eşkerayîye ro.