Stenbol de 150 sazgehê pawitoxê heqanê merdiman, sendîka, huqûq û rêxistinê demokratîkî û teba xeylî partîyanê sîyasîyan derheqê xoverdayoxanê grevê vêşanîye de deklarasyonêko hempar waşanaye. Temsîlkaranê sazgehan Şûbeya ÎHD’yî ya Stenbolî de kombîyayîşêk viraşt û pankarta ke ser o “Ma cuye bipawê, wa huqûq bêro bicaardene û kes nêmiro” nuşto akerde.

Proses acîl o û wext kilm o

 Sereka Beşê ÎHD’yî ya Stenbolî Gulseren Yolerî vat, “Seba ke proses zaf acîl o û ma wextêko kilm de no xebat kerd. Ma 150 sazgehî ameyî têhet û ma deklarasyonêk amade kerd.”

Grevê vêşanîye serrewextêk  xo pey de verda

Endamê Heyetê Rayberîya Weqfa Heqanê Merdiman a Tirkîya (TÎHV) Dr. Umît Bîçerî deklarasyono hempar wend. Bîçerî bale ante serê hemsereka KCD’yî û parlamentera HDP’yî Leyla Guvene û xoverdayoxanê grevê vêşanîye û vat, “Grevê vêşanîye serrewextêk xo pey de verda. Grevê vêşanîye xeylî gird o û êdî reşto sewîyeya krîzî yê merdimîye ke ma sey cimat do binê netîceyanê ey ra nêeşkena bivejîyê.”

Veng bidê vengdayîşê ma

Hetkarê Sereka Pêroyî ya EMEP’î Levend Tuzelî vat: “Bi rastî zî demokrasîyêk do bibo, ganî veng bidê nê qîrayîşê, nê waştişan û vengdayîşê ma.”

Wa huqûq seba her kesî bêro bicaardene

Aktîvîsta Têgêrayîşê Cinîyanê Azadan (TJA) nuştoxe Ayşe Berktaye zî vat, “Wayîrvejîyayîşê cuye, wayîrvejîyayîşê waştişê çalakwananê grevê vêşanîye yo. Eke ma cuye pawenê, ma vajê wa huqûq seba her kesî bêro bicaardene”