Îdarekaranê Têgêrayîşê Demokratîkî yê Yewbîyayeyî yê Şaran (HBDH) Ferzat Can û Duran Kalkanî Medya Haber TV de Bernameyê Taybetî yê 1ê Gulane de qisey kerd.

Ferzat Canî Roşanê Karkeran ê 1ê Gulane fîraz kerd û vat: ''1ê gulane roja têkoşîn, paştdayîş û yewîya karkeran a. 1976 ra nata Tirkîya û Kurdîstan de 1ê Gulane goreyê manaya xo yeno fîrazkerdene. Seke zanîyeno 1ê Gulana 1977î de 34 karkerî Meydanê Taksîmî de şayîye de bi barbarî ameybî qetilkerdene. Rixmê ney zî karkeran 1ê Gulane ra fek vera nêda. Darbeya 1980î ra dima 1ê Gulane amebi qedexekerdene. La bi taybetî têkoşînê azadîye yê kurdan ra dima serranê 90an de tim ame xîretkerdene ke 1ê Gulane goreyê manaya xo bêro fîrazkerdene.

AKPyî seba ke zemînê xo hîra bikero 2008 de destûr da şayîyanê 1ê Gulane la dima verê meydanan karkeran rê qefilnayî. Nê pêro kerdişî nêeşkayî ke karkeran têkoşînê 1ê Gulane ra dûrî bikerê. Hesret û girîngîya seba 1ê Gulane hinî zêde ya. Nê 1ê Gulane de ganî ma têkoşîn, waştişanê xo û meseleyanê esasan bikerê vernî. Ganî no 1ê Gulane ê bînan ra cîya bibo. 9 serrî yo dewleta tirke ya kolonyalîste û îqtîdarê AKP-MHPyî yo faşîste bi giranî hêrişê kurdan û sosyalîstan kenê. Bedelê şerê dewlete karker û kedkarî danê. Ganî emser sloganê 'Her ca Taksîm, her ca xoverdayîş' pêro şaristananê Kurdîstan û Tirkîya de xo bimojno ra.''

Duran Kalkanî ard ziwan ke 1ê Gulane roja yadkerdişê şehîdan a zî û vat: ''Rixmê xîretanê dewleta tirke zî kedkar û karkerî hêzê 1ê Gulane ra dûrî nêkewtî. Ma ciwanîya xo de raştîyî, zulm, teda, hêrişî meydananê 1ê Gulane de şinasnayî. Ma meydananê 1ê Gulane de resayî ruh û hişmendîya şorişgêran. Ewro no ruhê 1ê Gulane gandar o. Ganî ma nê 1ê Gulane meydanan de pêşwazî bikerê û têkoşînê xo yê vera faşîzmî xurtêr bikerê. Ma pê bawer ê ke no 1ê Gulane do bibo leweyê têkoşînê sosyalîstî.

Kurdîstan de sinifa karkeran zaf çin a. Sinifa dewijan hîna bitesîr a. La bi taybetî vejîyayîşê têgêrayîşê azadîye ra nata 1ê Gulane Kurdîstan de sey roja paştdayîş û têkoşînî bi xurtî yeno fîrazkerdene.  Ganî nê 1ê Gulane de coşê 8ê Adare û Newroze meydanana de ancî bêro mojnayene. Kurdîstan de şer dewam keno. Faturaya nê şerî sey krîzê ekonomîkî kedkar û karkerî danê. Coka ganî kedkar, karker, cinî û ciwanî vera şerî vengê xo berzêr bikerê.''