Bi wesîleya 1ê Gulane Roşanê Karkeran rayîrê ke şinê Meydanê Taksîmî û Kuçeyê Îstîklakî ameyî qefilanyene. Kedkar û karkerî rixmê qedexayan ver bi Meydanê Taksîmî şîyî. Polîsan hêriş kerd bi seyan kesî destbend kerdî.

Grûbê Mecîdîyekoyî rixmê heme hêrişan û astenkerdişan resayî Meydanê Taksîmî. Endamê Hêzê Têkoşînê Yewbîyayeyî (BMG) ke dekewtişê Elmadag de ameyî têhet raştê hêrişê polîsan ameyî. Şarî pencera û balokonanê xo ra hêrişê polîsan şermezar kerd. Çalakwanan peyser game nêeşte û bi sloganan rayraşîyayîşê xo yê ver bi Taksîmî rê dewam kerd. Polîsan pê îsotê gazî hêriş kerd xeylêk kesî destbend kerdî.

Harbîye ra zî grûbêke ver bi Taksîmî rayra şîye. Polîsan hêriş kerd tewr tay 35 kesî bi derbkerdişî destbend kerdî. Reyna Şîşlî de zî çalakwanî raştê hêrişê polîsan ameyî. Çalakwanan pê sloganan cewabê polîsan da.  Polîsan pê hêrişî xeylêk kesî destbend kerdî.

Endamê Têgêrayîşê Şorişgêrî û Têgêrayîşê Ciwanîye ke Taxa Asmali Mescîtî de ameyî têhet resayê Kuçeyê Îstîklalî û tîya wextêk rayra şîyî. Polîan dima ra  hêrişê înan kerd. Polîsan Bûlvarê Barbarosî de zî 30 kesî destbend kerdî. Rixmê heme hêriş, barîkat û destbendkerdişan şar resa Meydanê Taksîmî.