Îstanbul, Amed û Anqara de sereştişan de xeylêk kesî ameyî destbendkerdene.

Qezayanê Alîbeykoy û Esenlerî yê Îstanbulî de sereştişê keyeyan de Alî Coşkun û Kadrî Ertugrul ameyî destbendkerdene û berdene bi Mudirîya Asayîşî ya Îstanbulî.

Anqara de 13 kesê ke yadkerdişê şehîdanê gulane û Îbrahîm Kaypakkayî ra semed ameybî destbendkerdene polîsan eşt keyeyanê înan ser, cigêrayîşî kerd. Wextê nezaretî yê 13 kesan ame dergkerdene. Nameyê nê kesan wina yê: Cîhan Altaş, Ozan Deniz Odemiş, Hasan Altun, Denîz Agridogdu, Seçîle Işik, Faîk Hamarar, Huseyin Gençay, Sila Yurt, Selma Tokaç, Celîl Resîlogulları, Dogukan Ertan, Devîn Asya Açikellî, Berk Gokşar.

Amed de Hemsereko verên ê Sendîkaya Karkeranê Weşîye û Xizmetê Umûmîye (SES) Ramazan Kavak û lajê ci Velat Kavak 19ê gulane de ameyî destbendkerdene. Dîya zanayene ke wird kesî zî Mudirîya Asayîşî ya Amedî de tepişîyenê. Derheqê tehqîqatê înan de bira nimite esta.