Akademîsyenê hollandayîjî Joost Jongerdenî derheqê prosesê neweyî yê mabênê PKK û dewleta tirke de ANFyî rê qisey kerd.

Jongerdenî dîyar kerd ke Têgêrayîşê Azadîya Kurdîstanî nê prosesî sey destpêkê prosesêkê neweyî yê têkoşînê sîyasîyî vîneno. Jongerdenî bale ante vengdayîşê Haştîye û Komelê Demokratîkî yê Rayber Apoyî ser û vat: ‘’PKKyî vengdayîşî ra dima bire daye ke xo fesh bikero û çekan war verdo. Ocalanî seba komelê demokratîkî veng dabi. PKKyî zî bi biranê o mojna ke ê pabesteyê nê xîretê çareserîye yê.’’

Joost Jongerdenî da zanayene ke ganî astengîya mabênê îrtîbatê Rayber Apoyî û PKKyî bêra wedaritene û vat: ‘’Dewlete qebul bikera zî nêkera zî Abdullah Ocalan hetê kurdan û PKKyî ra sey lîderêkî yeno qebulkerdene. Ocalan meseleya kurdan de bîyo fîguro merkezî û lîderîya PKKyî de rolo diyîn girewt xo ser. Seba serkewtişê prosesî ganî astengîyê îrtîbatê mabênê Ocalanî û PKKyî wedarîyê û raşta raşte mabênê serekîyanê sîyasîyan de pêvînayîş bêro kerdene.

Seba çareserîya mende dewleta tirke ganî qebul bikera ke meseleya kurdan PKKyî ra wetêr yew mesele ya. Ronîyayîşê Tirkîya ra nata na mesele est a. Verê cû zî heta Mutabeqatê Deolmabahçe yê 2015î prosesê çareserîye est bi. La dewleta tirke xo nê prosesî ra apey ant. Narey girîng a ke dewlete înîsîyatîf bigêra û haştîyêka mende bîyara ca.’’