Çarçiweya  operasyonanê qirkerdişê sîyasîyî de  xeylî bajaran de polîsan eşt keyeyan ser û bi desan kesî tepiştî.

AGIRÎ

Vizêrî hêzanê ewlehîye, merkezê Agirî û qezayanê Bazîd, Patnos, Tutax ,Xemûr,Zêdkan, Avkevir û Dîyadîn de eşt keyeyan ser û kesê ke ameyî tepiştene Merkezê Ewlehîye yê qeza û bajarî de yenê girewtene.  Bi îdîaya serranê 2014-2015’î de beşdarê merasîmê cenazeyan, tazîye û beyanatê çapemenîye bîye û medyaya sosyale de pare kerdî, derheqê 55 kesan de tehqîqat ame akerdene û  ameyî tepiştene. Seba ke  dosyaya înan ser o qeraro nimite esto, derheqê înan de hîna zêde malumatî nêameyî girewtene.

Namzeta Hemserekîye ya HDP’yî ya Agırî Yelîz Karaaslane zî tede 55 kesî do meşte bierşawîyê dozgerîye.

ÎDIR

Îdir de zî hêzanê ewlehîye eşt xeylî keyeyan ser û seba ke derheqê ci de qerarê tewqîfkerdişî esto, 10 kesî  ameyî tepiştene. Nameyê tayê kesanê tepişteyîyan wina yê: Erol Kizilay, Murat Eker, Mahmut Kalkan,  Şerafettîn Kizilay, Adem Açilan, Ruhat Karadenîz û Ferhat Taşdemîr.

WAN

Qezaya Erdîşî yê  Wanî de zî polîsan eşt keyeyan ser û 7 kesî tepiştî. Polîsan kesê ke nameyê înan; Abdurrahman Fîdan, Şîrîn Sakur, Muhtîlla Dag, Bulent Zîlanli,Harun Yildiz, Eda Umaçe û Seyîthan Telek ê berdî Midûrîya Ewlehîye ya Qeza.

AMED

Amed de zî saetanê sereşewdirî de, polîsan eşt xeylî keyeyan ser û 6 kesî tepiştî.  Qaso ke malumat ameyo girewtene, sebebê tepişyayîşî parekerdişê medyaya sosyale ame musnayene. PoLîsan berê keyeyan şikitê û sehnayîş de her keye kerdo bi ser û bin.  Reyna goreyê malumatan, beno ke humarê tepiştoxan do bibo zêde.

Nameyê kesan ê tepişteyîyan wina yê: Vesîle Uzan Alîşan,Halîme Uzan Alîşan, Turkan Afşîn Uzan, Mesut Yildiz, Muhsîn Acar, Yusuf Gunduz.