5 girewteyanê bînan zî dest bi grevê vêşanîye kerd

 Seba ke Rayberê Şarê Kurdî Abdullah Ocalanî ser a tecrîd bêro wedaritene Hepisxaneyê Tîpê Tyî yê Amedî de 5 girewteyanê bînan zî dest bi grevê vêşanîye kerd.

Hemsereka KCDyî û Parlamentera HDPyî Leyla Guvene seba ke bale bianco tecrîdê Rayberê Şarê Kurdî Abdullah Ocalanî ser 8ê teşrîna peyêne ra na het dest bi grevê vêşanîye kerdo û na çalakîye xeylî hepisxaneyan de bêwext û bêdore dewam kena. Hepisxaneyê Tîpê Tyî yê Amedî de girewteyî Recep Bal, Firat Ertunç, Adnan Yîgîttekîn, Faruk Akbay û Mazlum Dîlekî 5ê Çile de dest bi grevê vêşanîye kerdo. Necatî Çepîko ke 11ê Çile de hepisxane ra vejîyayo ANFyî rê qisey kerd û no derheq de malumatî dayî.

Çepîkî mulaqat de va, hepisxaneyan de tesîrê Rayberê Şarê Kurd Abdullah Ocalanî zaf zêde yo û wina dewam kerd, "Tecrîdê serê Rayber Apoyî sucê merdimahîye yo. Embazanê ma Recep Bal, Firat Ertunç, Adnan Yîgîttekîn, Faruk Akbay û Mazlum Dîlekî, seba ke tecrîd bêro wedaritene 5ê Çile de dest bi grevê vêşanîye kerd. Heta ke tecrîdê serê Rayber Apoyî nêdarîyo we, grev do dewam bikero."

Çepîkî bale ante rewşa hepisxaneyan ser û va îdareyê hepisxaneyî nêweşan nêbeno revîr û wina dewam kerd, "Destûr nêdanê kitabê ke bi kurdî ameyê nuştene bikewê zere. Rojnameyê Yenî Yaşamî zî nêdîyeno girewteyan. Reyna awa germe zî nêdîyena û wexto ke yena zî yew di saetan de seba 180 kesan nêvejîna. Mudirê Hepisxaneyî Muharrem Kazan girewteyan tehdîd keno û cezayanê keyfîyan înan rê birneno. Ez cezayanê keyfîyan ver hepisxane ra 2 mengî  erey vejîyaya."