53 sîyasetmedaranê Swedî waşt, tecrîdkerdişê Ocalanî bêro werdaritene. Sîyasetmedaran vengdayîş kerd ke, komelê mîyanneteweyîye ra waşt ke zextê Konseya Ewropa û Komîteya Vernîgirewtişê Îşkenceyî bikero.
53 sîyasetmedarê partîyanê cîyayan ê Swêdî eşkerayîyêk daye û waşt ke, tecrîdkerdişê Rayberê Şarê Kurdî Abdullah Ocalanî bêro werdaritene.
Eşkerayîye de ame vatene ke 27’ê Hezîrene 2011’î ra nat destûr nêno dayene ke avûkatî Ocalanî bivînê û grevê vêşanîye yo ke seba wedaritişê tecrîdî bi rayberîya Leyla Guvene dest pêkerdîbi, beno gird.
Sîyasetmedarê Swêdî bale ante ke hemsereka KCD’yî û Parlamentera HDP'yî ya Colemêrgî Leyla Guvene 84 roji yo grevê vêşanîye yê bêdem û bêagêrayîşî de ya û qesawetê xo yê seba weşîya Guvene ard ziwan.
Eşkerayîya hempare de, komelê mîyanneteweyîye ra ame waştene ke seba wedaritişê tecrîdê Tirkîya zextê Konseya Ewropa û Komîteya Vernîgirewtişê Îşkenceyî (CPT) bikero.
Sîyasetmedaran ard ziwan ke, seba ke nîjadperestî û nêbaşvînayîş bîyo zêde, waştişê çareserîyê aştîyaneyî ameyî redkerdene, Leyla Guven bêçare mende û dest bi grevê vêşanîye kerd û nîşan bi vengberzkerdişê muhîmîya vengê dinyaye kerd.
Parlamenteranê ke îmzaya xo eşta bi eşkerayîye nê yê : Partîya Çepe ra parlamentera Ewropa Malîn Björke, Partîya Keskan ra parlamenterê Ewropa Bodîl Valero, parlamenterê Partîya Sosyal Demokrate ra Anders Österberg û Kadîr Kasirga, parlamenterê Partîya Çepe ra Danîel Rîazat, Ilona Szatmarî Waldau, Lorena Delgado Varase, Jens Holm, Alî Esbatî, Bîrger Lahtî, Momodue Malcolm Jallow, Amîneh Kakabavehe, Håkan Svennelîg û rayberê verên yê Partîya Çepe Lars Ohly.
