Seba protestokerdişê qerarê Amerîka yê derheqê 3 îdarekaranê PKKyî 82 partî, organîzasyon û sazîyî û bi desan şexsîyetî Bruksel de ameyî têhet. Serkêşîya Kongreya Neteweyî ya Kurdistanî (KNK) de 82 partî, organîzasyon û sazîyî û bi desan şexsîyetî seba hemverê qerarê tepişîyayîşê hîrê îderekaranê PKKyî de bibê wayîrê tewirêkê hemparî ameyî têhet. Temsîlkaran vat no qerarê Amerîka tenya hemverê PKKyî de nêyo, hemverê hemeyê Kurdan de yo.

Mîyanê têgêrayîşanê ke tewrê kombîyayîşî bîyê de partî û organîzasyonê sey Kongra-Gel, PJAK, KODAR, YNK, PYD, Komele, Partî Sosyalîstî Demokratî Kurdistan, El Partî Demoqratî Kurd, Partîya Komunîsta Kurdistan, Partîya Çep a Kurdan a Surîye, Partîya Kesk a Kurdistanî û Hîzbî Komunîstî Krekarî Kurdistan zî estê.

GANÎ KAMPANYA BÊRO DESTPÊKERDENE

Hemserekê KCDyî yo verên Hatîp Dîcleyî vat qerarê Amerîka antîdemokratîk o û nê vatî: “Ez nê qerarî şermezar kena, qerarêko bêexlaq o. Şexsê 3 îdarekaranê têgêrayîşê azadîye yê Kurdan de yeno waştene ke Kurdî bêrê cezakerdene. No qerar dewamê komploya mîyanneteweyîye ya 1999 yo.”

Dîcleyî ard ziwan ke “ganî hemverê qerarî de kampnayayêk bêro viraştene û na kampanya de zî nê bêrê kerdene:

1- Çarçiwaya qerarê Dîwanê Edaletî yê Strasbourgî yê Ewropa û Dîwanê Edaletî yê Belçîka de, Amerîka de dewa bêro akerdene.

2- Çar perçeyê Kurdistanî de û xeylî merkezanê dinya de bi tewrbîyayîşê partî, organîzasyon, sazî û şexsîyetan viraştişê kampanyayêka îmzayan. Dima ra zî nê îmzayî bêrê şirawitene bi Wezaretê Karê teberî yê Amerîka.

3- Şexsîyet, nûştox û rojnamegerê namdarî hemverê nê qerarî de rojnameyanê tîrajberzan rê meqaleyan binûsê.

4- Beyannameyê nê kombîyayîşî sey maîl Wezaretê Karê teberî yê Amerîka rê bêro şirawitene.”

Nûştox Alî Kerîmîyî zî vat ke Duran Kalkan, Cemîl Bayik û Murat Karayilanî 40 serrî seba azadîya şarê Kurdî mucadele dayo û vat: “Qerarê Amerîka qerarêko exlaqî û merdimayî nêyo. Heta ma Kurdî nêbê yew problemê winayênî do tim vejîyê vernîya ma. Verî Amerîka hetêk ra Yaser Arafatî sey terorîst name kerdêne, hetêna ra zî o sey namzedê Nobelî ramotêne. Çîyo ke ma girê dano tewirê Kurdan o, seba man o muhîm o.” 

Bi nameyê TJK-E Sabîha Gunduze qisey kerd û Amerîka ra vat: “Şima nêeşkenê serê Kurdan de kayanê xo kay bikerê. Ma do musade nêkerê. Çunke Kurdî ewro tarîx nûsenê. Ma do her wareyî de mucadele bidê.”