9 rêxistinê komelî yê sivîlî yê Swêdî ameyî têhet û Wezîra Karanê Teberî Margot Wallstrome rê mektube erşawite. Rêxistinan mektube de bale ante rewşa weşîye ya Leyla Guvene û çalakwananê binan a krîtîke ser.
Mektube kombîyayîşê Wezîrîya Karanê Teberî ya rêxistinê komelî yê sivîlî reyde ameybi kerdene de dîya Wallstrome.
Bi nameyê Partîya Çepe Yekbûn Alpe beşdarê kombîyayîşî bîye û derheqê binpaykerdişê heqê merdiman ê Tirkîya de qisey kerd.
Alpe qiseykerdişê xo ra dima, mektuba ke hetê 9 rêxistinanê sivîlan ê Swêdî ra ameya nuştene pêşkêşê Wezîra Karanê Teberî ya Swêdî Margot Wallstrome kerde.
Mektube de ameyo nuştene ke Tirkîya 3 serrîyo hetê rejîmê totaliterî ra yena îdarekerdene û derheqê binpaykerdişê heqanê merdiman de nimûneyê eşkerayî ameyî dayene.
ÎQTÎDARÊ AKP-MHP’YÎ WELAT KERDO SEY HEPISXANEYÊ AKERDEYÎ
Mektube de derheqê hêrişê ke HDP’yî rê yenê kerdene de wina ame vatene: “Îqtîdarê AKP-MHP’yî yo şoven, hêrişkar o dişmenê Kurdan keno ke statuyê estbîyayîş û kulturê Kurdan werte ra wedarno û asteng bikero. Rejîmê tekkesî yê Tirkîya, hemsencîya teberi ver nika nêeşkeno hêrişê Vakurê Surîye bikero, la bi ambargo û qeydeyanê bînan herême de hêrişanê xo domneno. Naye ra zî Kurdistanê Tirkîya kerdo meydanê şerî.
Îqtîdarê AKP-MHP’yî nêverdano ke vengêko muxalîf bivejîyo û bi no qeyde welat kerdo hepisxaneyêko akerde. HDP’yî weçînayîş de 2-3 katê nifûsê Swêdî yanê 6.1 mîlyon reyî girewtî. Parlamento de bîye partîya 3’yîne ya tewr pîle. Seba ke muxalîfê îqtîdarê AKP-MHP’yî yo, parlamenter û şaredarê HDP’yî bîyî hedef. Hemserekê ci Fîgen Yuksekdage û Selahattîn Demîrtaş, nêzdîyê 3 serranê ke hepisxane de yê. Teba Demîrtaş û Yuksekdage, bi desan parlamenter,şaredar û bi hezaran sîyasetmedarî girewte yê.”
LEYLA GUVENE VERA REJÎMÊ TOTALÎTERÎ VEJÎYAYE
Mektube de bale ancîye Hemsereka KCD’yî û parlamentera HDP’yî Leyla Guvene ya ke 7’ê Teşrîna Peyêne 2018’î ra nata greve vêşanîye de ya ser û wina ame vatene: ” Leyla Guvene, bi greve vêşanîye, vera rejîmê totalîterî vejîyaye. Tarîxê Komara Tirkîya de, reya verene yo ke yew parlamentere hande wexto derg o ke greve vêşanîye de ya.
Aktorê siyasî yê nê demî yo tewr muhîm lîderê PKK’yî Abdullah Ocalan o ke hepisxaneyê Îmralî de yo. Îqtîdaro ke awanbîyayîşê Tirkîyaya demokratîke ra terseno, prosesê haştîye qedêna. Pêvînayîşê haştîye zî bi no qeyde ameyî birnayene.”
SEBA HAŞTÎYE GANÎ TECRÎDÊ SERÊ OCALANÎ BÊRO WEDARITENE
Mektube de bale ancîya tarîxê Tirkîya ya ke bi qirkerdişê qewm û bawerîyan yena zanayene ser û ame vatene ke Tirkîya nika zî wazena eynî çiyan bîyaro Kurdan ser. Dewamê mektube de wina ame vatene: ”Waştenê Leyla Guvene, duştê sûcanê merdimahîye de sey rawiştişî yê. Seba haştîye û demokrasîyî, ganî tecrîdê serê Abdullah Ocalanî bêro wedaritene.”
Mektube de Wezîra Karanê Teberî ya Swêdî ra ame waştene ke wa no derheq de bi hawayêko lezkanî têgêrayîşan bikero. Sazîyê ke îmzaya xo eşta bine mektube wina yê: Merkezê Komelê Demokratîk ê Kurdan ê Swêdî. Yewîya Cinîyan a Sara, Enstîtuya Kurdî ya Stockholmî, Buroyê Rojawayî, PYD Swêd, KNK, Meclîsê Cinîyan ê Amara,PJAK, Federasyonê Elewîyan û Komelaya Paştdarîye.
