90 pisporî do xerîteya rayîrî yê kurdkî xêz bikerê

Sereko pêroyî yê OSPyî Sînan Çîftyurekî polîtîkayê asîmîlasyonî yê serê kurdkî sey “kansero sosyal” name kerdî û vat ke do komxebate de nizdê 90 pisporê ziwanî bêrê têhet û munaqeşeyan bikerê.

New partîyê ke HDP, DBP, OSP, PSK, KDP-B, KDP-T, PAK, ÎOP û Însîyatîfê Azadî ra yenê pê dimayo ke “Platformê Ziwanê Kurdkî” awan kerdî kampanya daye destpêkerdene.

Seba ke kurdkî bibo ziwano fermî û ziwanê perwerdeyî do platform Amed de mabênê tarîxanê 10-11 de komxebatêk virazo, xerîteyêka rayîrî xêz bikero. Sereko pêroyî yê Partîya Azadî û Sosyalîzmî Sînan Çîftyurekî derheqê komxebate de Ajansê Mezopotamya rê qisey kerd.   

 ‘DO SÎNERJÎYE RÊ ZEMÎN HADRE BIKERO’

Çîfyurekî vat: “Sey sazîyê sîyasî û sivîlan, roşinvîr, hunermend, mele û şarê xo ma do seba tespît bikerê tirêm ma eşkenê hemverê asîmîlasyonê serê kurmanckî û kirmanckî de se bikerê komxebatêk virazê. Komxebate de nizdê 90 kesan dir bi pêşnîyaz û projeyan seva sînerjîyêka hempare zemîn bêro hadrekerdene.”

 ‘HEDEFÊ MA YO EWILÊN FERMÎBÎYAYÎŞÊ ZIWANÎ YO’

Çîftyurekî polîtîkayê asîmîlasyonî yê serê kurdkî sey “kansero sosyal” ercna û vat ke na kampanya feryadê şarê kurdî ana ziwan. Çîfyurekî vat: “Do komxebate de stratejîyêka hîrê gamine bêro teqîbkerdene. Game yewine de do partîyê sîyasîyî yê kurdan waştişan bigîrê rojdemê xo û seba fermîbîyayîşê kurdkî û perwerdeyê bi kurdkî rayapêroyî hadre bikerê. Gama dîyine de barê hukmat û burokrasî de teşebusî bêrê kerdene û nê waştişî bêrê resnayene. Gama hîrêyine zî do mesela bêro berdene rojdemê Yewîya Neteweyan (YN).” 

KAMPANYA AMÎ HEDEFGIREWTENE

Dewamê qiseykerdişê xo de Çîftyurekî vat: “Dormeyê neteweperweran ê tirkan ma hedef ramotî û kampanyaya ma sey ‘partîyanê parekerdoxan hemverê ziwanê tirkî de şer îlan kerd’ name kerde. Problemêkê ma bi tirkî û şarê tirkî çinyo. Vanê ke 9 partîyî hemverê Tirkîye de kewtê hesaban mîyan û paştîya xo daya Amerîka û Sîyonîzmê Îsraîlî. Nê zûrê pîl ê. Partîyanê kurdan ê ke kampanya daya destpêkerdene paştîya xo nêdaya cayêk. Ma wazenê ke rayapêroyî ya Tirkîye û ya mîyanneteweyîye feryadê şarê kurdî bieşnawê. Ma wazenê kîşta tirkî de kurdkî zî bibo ziwano fermî û mekteban de dibistana ewilêne ra heta unîversîte bi ci wendekaran rê perwerde bêro dayene. Na raştî sey her kesî rojnameyê Aydinlikî zî zano, la zûran keno û wazeno pîjiknayîşan virazo.”