Baska Wanî ya Rayraşîyayîşê Azadîye yê Pîlî ewro resaye qezaya Şemzînanî ya Colemêrgî. Hemserekê DEM Partî Tuncer Bakirhan û Hemserekê DBPyî Keskîn Bayindir zî tede girse heta merkezê qeza şarî reyde şi.

Şarî bi çepik û tîlîlîyan girse pêşwazî kerd. Heta verê bînaya DEM Partî ya Şemzînanî girseyî û şarî sloganê sey "Bijî Berxwadana zindanan", "Ji tecrîdê re na, aştî aniha" û "Bimre koletî, bijî azadî" vatî. 

Wekîlê DEM Partî Zekî Îrmezî verê bîna de şar selam kerd û îfade kerd ke îradeyê şarê kurdî qetî do tecrîdî bişikno. Îrmezî vat: ''Şarê Kurdîstanî û Tirkîya pabeyê ci yê ke Îmraliyî ra vengêk vejîyo. Embazanê ma seba ney zîndanan de dest pê grevê vêşanîye kerd. Ma zî no rayraşîyayîş da destpêkerdene. Ma do bi qerardarî rayraşîyayîşê xo rê dewam bikerê.''

Hemsereka MED TUHAD-FEDî Emîne Kaya ard ziwan ke Rayberê Şarê Kurdî Abdullah Ocalan haştîye wazeno û ganî o cade bêro azadkerdene. Namzetanê Hemşaredarîya Şemzînanî zî vera tecrîdê Îmraliyî nêrazîbîyayîşê xo mojna.

Qiseykerdişan ra dima çalakîkeran û şarî pîya govende girewte.  Çalakîkerî Şemzînanî ra dima do şorê Geverî.