Mayê/Merdimê Şemeyî semedê persayîşê aqibetê merdimanê xo yê ke bi destê dewlete ameyî vînkerdene û semedê muhakemekerdene kiştoxan hewteyê hezarinî yê çalakîya xo de Meydanê Galatasarayî de ameyî têhet.

Partîyanê sîyasîyan û hêzanê demokrasî zî paştî daye çalakîye. Hemvervatoxê HDKyî Esengule Demir û Cengiz Çîçek û Hemserekê Pêroyî yê DEM Partî Tulaye Hatimogullari û Tuncer Bakirhan zî tewrê çalakîya nê hewteyî bîyî.

Metnê çapemenîye de nê ameyî vatene: ''Ma hezar hewte yo ke tîya yenê têhet û merdimanê xo wazenê ke hetê dewlete ra ameyî destbendkerdene û dima ra ameyî vînkerdene. Kesê ke ameyî vînîkerdene ma ne ê dîyî ne zî cenazayê înan. Înan ra têna ma rê fotografî mendê ke ma çalakîye de kirişenê. Ê zî sey şima bî, tewr sînayeyê ma bî. Hezar hewte yo  ke dejê ma kêm nêbeno û ma bi hêvî pawenê.  Hezar hewte yo ma aqibetê merdimanê xo persene ke dewlete girewtî berdî. Merdimê ma yê vînîkerdeyî hey ça de yê, kiştoxê înan qey nînê cezakerdene. Ma xo vîra nêkenê, ma do çirey înan xo vîra mekerê. Hezar hewte yo ma qîrenê, ma do çirey waştişê xo ra peyser game meerzê.''

Dayîka Hasan Ocakî yo ke ameyo vînîkerdene, Emîne Ocak semedê paştdayîşî her kesî rê spas kerd û  caardişê edaletî waşt.

Dayîka xebatkarê rojnameyê Ozgur Gundemî Ferhatî Tepeyî yo ke nezarat de ame vînîkerdene, Zubeyde Tepe zî ard ziwan ke xeylêk xebatkarê Ozgur Gundemî ameyî vînîkerdene û vat, ''Ma do Galatasarayî cameverdê. Heta kerdoxî Tansu Çîler, Mehmet Agar, Korkmaz Tanhan berê muhakemekerdene ma do têkoşînî rê dewam bikerê.''

Cinîya Fehmî Tosunî yo ke ame vînîkerdene, Hanime Tosun zî wina vat: ''Ê do miheqeq rojêke hesab bidê ma. Ma do cigêrayîşê edaletî cameverdê. Heta ke kiştoxî berê muhakemekerdene ma do tîya de bê.''

Waya Hayrettin Erenî yo ke ame vînîkerdene, Îkbale Eren zî mesajê ''Ma do xo vîra mekerê, medê vîrakerdene'' da.

Kênaya Îbrahîm Demîrî yo ke nezarat de ame vînîkerdene, Denîze Demîr zî ard ziwan ke do heta nefesê xo yê peyênî peyê edaletî de bê.

Cinîya Kasim Aksoyî  Erdogan Aksoy zî vat, ''Çimê mêrdeyê mi girewtî û berd zîndan û vînî kerd. Ma bimirê zî tornê ma do bêrê tîya.''

Cinîya Savaş Buldanî û wekîla DEM Partî Pervîne Buldan zî vat: ''Mezelê ma çîn o ke ma serê ci de vilikan ronê û dûa bikerê. Coka heta vînayîşê merdimanê ma û cezakerdişê kiştoxan ma do tîya de bê. Çunke no meydan meydanê edaletî yo.''

Birayê Cemil Kirbayirî yo ke ame vînîkerdene, Mikail Kirbayîrî zî vist vîrî ke seba tîya bêrê têhet raştê zaf bêhuqûqîyan ameyî û vat na dewlete mi rê yew mezel deyndar a.

Torna Îbrahîm Çelîkî Şevîne Çelîk zî vat a semedê pîrikê xo edalet wazena.