Endamê AvEG-Kon, YS, ACTÎT, SKB û CDK-F’î yê ke Merkezê Kulturê Kurdî yê Ahmet Kayayî de 3 rojî yo grevê vêşanîye de yê, tewrê merasîmê vîrardişê qurbananê Qirkerdişê Dêrsimî bîyî. Çalakwanî verê Abîdeyê Elewîyan ê Parîsî de, hetkarê Şaredarê Sarcelleyî û temsîlkaranê dezgehan ê ke çar hetanê Ewropa ra ameyê reyde qurbanê Qirkerdişê Dêrsimî yad kerdî.

Çalakwananê grevê vêşanîye eynî roje de Meydanê Chatelet les Hallesî yê Parîsî de stant akerd, vera tecrîdî vilawekî vila kerdî.

Danê şanî saete 17:00 de zî Merkezê Kulturê Kurdî yê Ahmet Kayayî de derheqê grevê vêşanîye, xoverdayîş û têkoşînî de panelêk ame viraştene.

Hetê bînî ra serdayîşê seba çalakîya grevê vêşanîye dewam kenê. Nuştox Zîya Ulusoy, rojnamegere Arzu Demîre, endamê Halkevî û Êlegçeqerî şîyî serdana çalakwanan.