15 çalakwanê ke Strasbourg de grevê vêşanîye yê bêdem-bêagêrayîşî de yê mesajê xo yê serra newî de soz da ke do 2019 de xoverdayîşê seba azadîya Ocalan û Kurdistanî xurt bikerê û faşîzmî birijnê.
Çalakwananê grevê vêşanîye yê Strasbourgî seba serra newî mesajê serkewtişî dayî.
Eşkerayîye de ame vatene ke serra 2018î seba Kurdan serra xurtkerdişê xoverdayîşî bî û şarî hemverê qirkerdişanê çar perçeyanê Kurdistanî xo ver da. Heman wextî de ame vatene ke xeyrê mucadeleyê 2018î dinya DAÎŞî rê amî tengkerdene.
“SEBA KE VERNÎYA QEDÎYAYÎŞÊ XO BIGÎRÊ BI HER HAWAYÎ HÊRIŞ KENÊ”
Eşkerayîye de nê vajîyayî: “Hemverê pîlbîyayîşê mucadeleyê azadîye de hêzê îşxalkar û faşîstî ancî kewtî dewre. Serra 2018 de bi îşxalê Efrînî rîyo faşîst yê AKP û Erdoganî hîna bi eşkera. Îtîfaqo faşîst ê AKP-MHPyî seba ke vernîya qedîyayîşê xo bigîrê bi her hawayî hemverê şarê Kurdî de hêriş kenê.”
“MA BI XURTKERDIŞÊ XOVERDAYÎŞÎ KEWENÊ 2019”
Dewamê eşkerayîye de nê vajîyayî: “Ma sey şar bi xurtkerdişê xoverdayîşî kewenê serra 2019. 2019 de mucadeleyê azadîye yo ke hemverê dîktator Erdoganî de yeno dayene do bi ser bikewo. Do Rayberê Şarê Kurdî Abdullah Ocalan 2019 de azad bibo, faşîzm vîndî bikero û serra 2019 bibo serra azadîya Rayberîye û şarî.”
VENGDAYÎŞÊ SEBA BERZKERDIŞÊ MUCADELEYÎ
Eşkerayîye de vajîya ke “Ma tecrîdî bişiknê, faşîzmî birijnê û Kurdistanî azad bikerê. Serra 2019î do bibo serra azadîya Rayber Apoyî û Kurdistanî.”
Tewr peynîya eşkerayîye de serra newî ya şarê Kurdî û heme merdimîye amî pîrozkerdene.
