Grevê vêşanîye yo ke bi tewrbîyayîşê grûbanê Danîmarka û Norveçî paytextê Swêdî Stockholm de yeno viraştene dewam keno. Çalakwanan vizêr parlamentode pêvînayîş viraşt.

Bi nameyê çalakwanan Tord Vîktor Joensen, Lîda Weert û Hozane Fîgene parlamento zîyaret kerd û  parlamenterê Partîya Lîberale û vervatoxê Poltîkaya Tebere Fredrîk Malmî dir pêvînayîş viraşt. Çalakwanan derheqê tecrîdê serê Ocalanî û grevan de qisey kerd û Partîya Lîberale ra waşt ke vera tecrîdî tê bigêro. Malmî vat ke o do na babete bikirişo rojdemê meclîsî.

Malmî yo ke pêvînayîşî ra dima ANF’yî rê qisey kerd, ard ziwan ke semedê paştdayîşê Leyla Guvene û çalakwananê grevê vêşanîye çiyêko destê ey ra bêro, o do bikero. Malmî bêvengîya dinya yê vera kerdişanê Erdoganî rê reaksîyon da û va: ‘‘ Ganî dinya vera polîtîkaya  işxalkare ya Erdoganî vengê xo vejo. Erdogan verê çimanê dinya de hêrişê Rojawanî keno. Ganî vera hêrişanê Erdoganî paştdayîş bidîyo Kurdan.‘‘

Hozane Fîgene zî vernîya parlamento de semedê Leyla Guvene deyîrêk vate.