Çalakwanan meydanê Odenplanî yo ke merkezê Stockholmî de yo xeyme ronaye û kewtî grevê vêşanîye. Çalakîye de heman wextî de vilawekî yenê vilakerdene û qalê amacê grevanê vêşanîye yeno kerdene.

Aktîvîsto Norwecij Vîktor Joenseno ke grevê vêşanîye de yo, meydanê çalakîye de bi Îngilîzkî qisey kerd û vat bi serkêşîya Leyla Guvene 7’ê Mijdar a 2018’î ra nata hemverê tecrîdkerdişê Rayberê Şarê Kurdî Abdullah Ocalanî de grevê vêşanîye yeno kerdene.

Pêşnîyarê Ocalanî Temînatê Çareserîya Aşitîyanîye Yê

Joensenî vat xeylî cayanê dinya de grevê vêşanîye yenê kerdêne û bale ante ke waştişo hempar ê çalakwananê grevê vêşanîye qedînayîşê tecrîdkerdişê Ocalanî yo ke serra 2011’î ra nata ê ser o tecrîdêko girankerde yeno bicaardene.

Joensenî vat, “Rejîmê Erdoganî seba vernîya çareserîya aşitîyanîye yê problemê Kurdan bigêro çi destê ci ra yeno texsîr nêkeno. Pêşnîyarîya komara demokratîke û xoserîya demokratîke ya Abdullah Ocalanî temînatê çareserîya aşitîyanî ya. Ganî tecrîdkerdişê Ocalanî rê peynî bêro ardene û pêvînayîşê seba aşitî newe ra dest pê bikerê.”

Joensenî veng da hukmatê Swêdî, Konseya Ewropa û CPT’yî ke bes o hende bêveng mende û seba qedînayîşê tecrîdî wa bikewê mîyanê têgêrayîşî.

Ganî Kurdê Anatolîya Mîyanêne Grevanê Vêşanîye rê Wayîr Vejîyê

Çalakwanan ra yewe zî vervatoxa Meclîsê Cinîyan ê Sêvê yê Danîmarka Zelîha Tîtreke bîye û aye seba wayîrvejîyayîşê grevanê vêşanîye veng da Kurdanê Anatolîya Mîyanêne.

Tîtreke ard vîrî ke a zî Kurdêka Anatolîya Mîyanêne ya û vat, “Ganî ma înan rê wayîr vejîyê. Grevê vêşanîye seba ma bi rastî zî zaf muhîm ê. Seba ke grevanê vêşanîye bi Leyla Guvene dest pêkerd no seba ma xeylî manîdar o. Naye ra ganî ma grevanê vêşanîye rê hîna zaf wayîr vejîyê.”