Şaristanê Strasbourgî yê Fransa de grevê vêşanîye yo bêdem-bêagêrayîşo ke seba wedartişê tecrîdê serê Rayberê Şarê Kurdî Abdullah Ocalanî û paştîdayîşê çalakîya grevê vêşanîye yê parlamentera HDPyî ya Colemêrgî Leyla Guvene hetê “Însîyatîfê Ocalanî rê Azadî” ra amebi destpêkerdene kewt roja 8ine. Çalakwanan ANFyî rê qisey kerd.

ÎMÎR: AMACÊ MA YO BINGEYÊN ŞIKTIŞÊ TECRÎDÎ YO

Grevê vêşanîye yo bêdem-bêagêrayîşo ke hetê “Însîyatîfê Ocalanî rê Azadî” ra şaristanê Strasbourgî yê Fransa de amebi destpêkerdene roja xo ya 8ine de yo. Çalakwanan seba “Ma dorê Rayberîya xo de bêrê têhet” veng da.

Çalakwanan ra Ramazan Îmîrî wina qisey kerd: “Rayber Apoyo ke 20 serrî yo bi tena serreyê xo girawa Îmraliyî de yeno tepiştene halê weşîya ci ra ma bifikar ê. Wazenê ke ê hetê fîzîkkîyî ra îmha bikerê. Ma bawer kenê ke no tena dewleta Tirkî dir bisînor nêyo. No konseptêkê hêzanê mîyanneteweyîyan, statukoperweran û hêzanê hemkaran o. Amacê ma yo bingeyên wedartişê tecrîdê serê Rayber Abdullah Ocalanî yo.”

URAL: GANÎ ŞAARÊ MA BIKEWO MÎYANÊ TÊGÊRAYÎŞÎ

Çalakwanan ra Egîd Uralî vat: “Amacê na çalakîya ma şikitişê tecrîdê serê rayberîya ma yo. Heta no tecrîd bişikyo do çalakîyê ma zî dewam bikerê. Ez veng dana ciwanan ke wa şarî organîze bikerê û bifînê têgêrayîşî mîyan. Ancax ma bi organîzasyonbîyayîşêkê winayênî eşkenê tecrîdî bişiknê.”

SURGUT: MA ÇALAKÎYA XO DE BIQERAR Ê

Denîz Surgutî zî ard ziwan ke çalakî 7 rojî xo ra dima verdayê û vat: “Ma biqerar ê ke çalakîya xo heta peynî bidomnê. No do weşîya ma ser o tesîr bikero la do biqerarîya ma ser o tesîr nêkero. Eke şarê ma weşîya ma fikrêno baro ke keweno milê înan wa bica biyarê. Ma biqerar ê û net ê.”

SOLHAN: DESTÊ KAMÎ RA ÇI YENO GANÎ BIKERO

Kerem Solhanî wina vat: “Şarê ma ganî her ca de tewrê nê prosesî bibo. Destê înan ra çi yeno bikero.”

Çalakwanan ra Ayvaz Eceyî vat: “Heta ma tecrîdî bişiknê ma tîya yê, nêşinê. Ganî şarê ma dorê rayberîya xo de xelqe virazo. Bê serkewtişî sewbîna şansê ma çinyo.”